Ukrayinağa elâk olğan 1000 ceset qaytarıldı, dep haber ete Cenk esirlerine munasebet koordinatsion ştabı.
Rusiye tarafınıñ malümatına köre, olar Ukrayina arbiylerine ait.
Eñ yaqın vaqıtta qaytarılğan cesetlerniñ kimlikleri belli olacaq.
Rusiye ise Ukrayinadna 31 arbiyniñ cesedini aldı, dep bildirdi RBK neşirine parlamentniñ arbiy operatsiya meseleleri koordinatsion gruppasınıñ vekili, Devlet dumasınıñ deputatı Şamsail Saraliyev.
Cesetler Halqara qızıl haç aracılığınen almaştırıldı.
İyün ayında İstanbul añlaşmalarına köre yapılğan cesetlerni qaytaruv tedbirleriniñ soñuncı basamağı oldı, Ukrayina 6057 ceset aldı. Şimdi ekspertizalar keçirile ve kelgen cesetlerniñ identifikatsiyası yapıla.
Ukrayinada 70 biñden ziyade insan ğayıp olğan olaraq sayıla. Böyle malümatnı bu yıl iyün ayında hususiy vaziyetlerde ğayıp olğan şahıslardan vekâletli olğan Artur Dobroserdov seslendirdi. Onıñ aytqanına köre, bir çoqunıñ taqdiri cenk bitken soñ ya da faal cenk areketleri bitken soñ belli olacaq.