Ukrayina Silâlı quvetleriniñ Mahsus operatsiyalar küçleri Qırımda Şimaliy-Qırım kanalınıñ köprüne darbe endirdi, dep bildirdi. Video içtimaiy ağlardaki saifelerinde derc etildi.
Berilgen malümatqa köre, darbeler iyünniñ 22-ne ve iyünniñ 23-ne keçer geceleri endirildi.
"Bu, işğalcilerniñ strategik arbiy-logistik damarı edi. Obyekt yük, resurs ve arbiy-mal vastalarını eki esas yönelişte: Rusiyeden Qırım üzerinden – cenübiy yönelişte ordunı temin etmek içün ve yarımada içinde – Qırım arbiy infrastrukturasınıñ işine qoltutmaq içün naqliyat ayatınıñ bir qısmı edi", – dep aytıla video altındaki yazıda.
Ukrayina mahsus hızmetleri bildirgenine köre, darbe neticesinde demiryol qısmı yoq etildi, yolnıñ bir parçası avdarıldı. Tamir tehnikası kelgen soñ Mahsus operatsiyalar küçleri iyünniñ 23-ne keçer gecesi tekrar darbe endirdi, dep qoştı Ukrayina arbiyleri.
"Aynı vaqıtta, Mahsus operatsiyalar küçleri Areketiniñ gizli iştirakçileri mahsus tamir demiryol tehnikası keldi, dep bildirdi. Missiyanıñ ekinci qısmı başladı. İyünniñ 23-ne keçer gecesi Mahsus operatsiyalar küçleri em tamir tehnikasına, em köpürden qalğanlarına tekrar ücüm etti", – dep aytıla haberde.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.