Ukrayina prezidentiniñ Qırım Muhtar Cumhuriyetindeki temsilciligi bildirdi ki, 2024 senesi yanvar ayına qadar rusiyeliler qanunsız alda 204 insannı apiske aldı, olardan 123-ü qırımtatardır. Mütenasip haber müessiseniñ Facebook saifesinde derc etildi.
''2024 senesi yanvar ayına qadar işğalciler qanunsız olaraq 204 insannı apiske aldı, olardan 123-ü qırımtatardır. Umumen 33 kişi tevqif etildi (olardan 22 qırımtatar), 150 kişi apiske alındı (olardan 100 qırımtatar), 21 kişi statussız qaldı'', - dep aytıla haberde.
Keçken sene dekabr ayında Ukrayina prezidentiniñ Qırım Muhtar Cumhuriyetindeki daimiy temsilcisi Tamila Taşeva Qırım.Aqiqatnıñ sualine cevap berip, 2023 senesi dekabr ayınıñ soñuna qadar Qırım sakinlerine nisbeten siyasiy sebeplerden azatlıqtan marum etüvniñ 191 adisesi qayd etilgenini bildirdi.
Dekabrniñ 19-nda Ukrayina prezidenti Volodımır Zelenskıy, yekünleyici matbuat konferentsiyası vaqtında, Kremlniñ qırımlı mabüsleriniñ, şu cümleden Qırım.Aqiqatnıñ nevbetten tış jurnalisti Vladislav Yesipenkonıñ azat etilmesi ile bağlı vaziyet "mürekkep" qala, dep bildirdi.
Bundan evel "Qırım platforması" sammitinde iştirak etken ZMINA insan aqları merkezi ve Qırım aq qorçalayıcı gruppasınıñ uquq qoruyıcıları, ilhaq etilgen Qırımda vatandaş şahısları, şu cümleden siyasiy mabüsler, arbiy esirlerge nisbeten deñişimge daa az rastkele, dep qayd etken ediler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.