Ukrayina devlet başı Volodımır Zelenskıy Kıyivniñ Ğarp ortaqları tarafından defalarca qayd etilgen adaletli barışıq kontseptsiyasınıñ Ukrayina içün manasını añlattı.
"Epimiz içün barışıq farqlı şekillerde adaletlidir. Bir prezident olaraq menim içün adaletli barışıq – mustaqilligimiz, topraq bütünligimiz, suverenitetimiz ile bağlı iç bir uzlaşuvğa ketmemek demektir, bu eñ müimidir. Daa bu Rusiye tecavuzınıñ yapqan zararını tazmin etüv", - dep qayd etti o.
Aynı zamanda, Zelenskıy cenk neticesinde tuvğanlarını ğayıp etken insanlar içün adaletli barışıq mümkün olmağanını tahmin etti.
"Qaç ana-baba oğlunı ve qızını cebede ğayıp etkenini bilesiñiz. Adaletli barışıq olar içün nedir? Tazminatlar olarnı meraqlandırmay. İnglizce bir söz bar - intiqam, mına bunıñ içün olar yaşaylar. Olar intiqam ile yaşaylar... Ve cenkniñ ne qadar çoq sürse, bu intiqam ile yaşağan ana-babalarnıñ sayısı ep artacaq. Men bunı kördim, men bu insanlarnı bilem. Bu zalımlarnıñ ketirgen cenkte adaletli barışıq yoq", - dedi devlet başı.
Dekabrniñ 21-nde Volodımr Zelenskıy ve Joseph Biden üç saat qadar devam etken eki taraflı körüşüv keçirdiler.
Washington ziyareti Volodımır Zelenskıynıñ Ukrayinağa qarşı büyük Rusiye istilâsı başlağanından ilk çetel ziyareti oldı.
Ukrayina akimiyetiniñ malümatına köre, dekabrniñ 20-nde Ukrayina prezidenti Volodımır Zelenskıy Donetsk vilâyetindeki Bahmutta Ukrayina arbiyleri ile körüşti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.