"Ukrayina oğrunda küreş – bütün cebelerde". TikTok-bloger Qara qaşlı – cenk, Qırımğa qaytuv ve Rusiyeniñ öz-özüni mahv etüvi aqqında

Danılo Gaydamaha (Qara qaşlı) TikTok içtimaiy ağında 100 000-den çoq abunecisi olğan ilk ukrayinalı blogerdir. Danılo ukrayin tiliniñ qaideleri, vatanperverlik aqqında qısqa videolar çıqarıp ve rus tilinden ukrayin tiline keçüv ile bağlı tevsiyeler berip başlağanlar arasında birincilerdendir. Bu tevsiyelerniñ ameliy hasiyeti bar, çünki Danılo özü bu yolnı keçti: üç yıl devamında, 16 yaşından 19 yaşına qadar o öz ukrayinleştirilmesi üzerinde çalıştı, soñ ana-babası da oña qoşuldı. Olar Qırım sakinleri, şunıñ içün Danılo çoq vaqıt Qırımda keçire edi. 2014 senesinden soñ da anda qatnay edi. Şimdi bloger emindir ki, Qırım Ukrayina nezaretine qaytacaq, çünki tarihiy adalet böyledir.

Qırım.Aqiqatqa intervyü vaqtında Danılo Gaydamaha Rusiyeniñ Ukrayinağa qarşı cenki ve onıñ tarihiy emiyeti aqqında aytıp berdi. Ukrayinalı student ve faal ukrayinlerniñ milliy ruhunı ne küçledirgeni, Rusiyeniñ kelecegi aqqında fikir ete ve ukrayinlerni ukrayin tilinde laf etmege çağıra.

Cenkler ne içün ola?

Qırımdan ukrayinalı bloger Qara qaşlı Qırım.Aqiqatqa intervyü vaqtında bir çoq halqlarnıñ azatlıq oğrunda yolu cenk yolu ile ketmesi aqqında fikirni bildirdi.

"Men is etem ki, er bir halq içün cenk qaçınılmazdır. Bir halq azat yaşamağa qarar bergende, aqiqat ve sevgi oğrunda öz aynılığını qurmağa qarar bergende, böyle qarar bermegen bunıñ yerine qaranlıqnı, keçmişni, cenkni, yat asabalıqnı saylağan halq bunı begenmez. Azat olsañ, sevseñ yüz faiz qaranlıq buña qast etecek. Azat ve sevgi ile, cenksiz yaşamaq içün tarihiy temelge esaslanmaq kerekmiz. Tarihnı ve onıñ hatalarını añlamaq içün onı em ögrenmek, em de añlamaq kerek. Ve bunı Rusiyeniñ bugün yapqanı kibi öz aynılığımıznı yalıñız keçmiş üzerinde qurmaq içün degil, bu hatalarnıñ tekrarlanmaycaq bir kelecek qurmaq içün qullanmaq".

"Ukrayina oğrunda küreş – bütün cebelerde"

Danılo Gaydamaha Rusiye ordusınınh Ukrayinağa qarşı keniş mıqyaslı istilâsı 2022 senesiniñ fevral ayından bayağı evel başlanğan cenkniñ devamı olğanını tüşüne.

"Cenkniñ arbiy (çünki medeniy ve til cenki endi asırlar devam ete) basamağı devam etken bütün bu sekiz yıl içinde cenkniñ 300 yıl, belki de daa çoq devam etkeneni aytıp beredem. Şimdi cenk basamağınıñ daa da keskinleşmesi ve keniş mıqyaslı istilâsınıñ başlaması yaşayışımızğa büyük tesir ete. Amma asılında tarih ceetinden iç bir vaqıt toqtamağannıñ devamıdır. Ukrayina oğrunda bütün cebelerde küreşmege devam etemiz: tek arbiy cebede degil, amma daa til, biznes, iqtisadiyat cebesinde de".

Danılo Gaydamaha (Qara qaşlı)

Tilniñ emiyeti barmı?

Qara qaşlınıñ fikrince, ukrayin tiliniñ emiyetini qıymetlendirmek imkânsız, çünki o asırlar devamında Ukrayina devletçiligini saqlağan özektir.

"Keçmişte çoq cenkni biz yutquzdıq. Ordu yutquza edi, siyasetçiler yutquza ediler, biz öz devletçiligimizni ğayıp ete edik, yüz yıllıq işğal altına oğray edik. Amma Ukrayina bugün bar, çünki til cebesinde asla yutquzmağan edik. Ordu yutquzğanda, siyasetçiler yutquza ediler, til ise Ukrayina devletçiligini qorçalap, oña ğayrıdan tiklenmege yardım ete edi. Bugün ordumıznıñ ğalebe qazanacağına, siyasetçilerimizniñ ğalebe qazanacağına iç kimseniñ şubesi yoqtır. Bugün Ukrayinağa nasıl yardım etecegiñizni bilmeseñiz, tilden başlañız, ukrayin tilinde laf etip başlañız".

Rusiye aqiqaten nenen cenkleşe

Danılo Qırımnıñ ve Donbasnıñ Rusiye tarafından işğal etilmesi ve bugünde işğal altındaki topraqlardaki ocalarnıñ, fallerniñ taqip etilmesi arasında paraleller keçire. Onıñ fikrince, bu, Rusiyeniñ ukrayinlerniñ kimliginiñ bütün tezahüratlarını mahv etmek niyetinde olğanını köstere.

"Yañı topraqlarnıñ işğal etilmesi sekiz yıl evel Qırım ve Donbasnen olğanğa pek oşay. İşğalci kelgende, ilk yapqan şeyi kitaplarnı, kitaphanelerni yoq ete. Oqutv esnasına kirişe, ukrayin tilinde olğan er şeyni çekip almağa tırışa. Ve bunı ukrayin olğan bütünni begenmegeninden yapmay. Bunı anda ruh, aqiqat, azatlıq olğanı içün yapa. O bunı yoq etmege tırışa. Eminim ki, eger ukrayin er şey işğalcilerniñ altında olsa edi, eger de biz öz azatlığımızdan ve demokratiyağa ıntıluvımızdan red etse edik, olar ukrayin Ukrayinanı qabul eter ediler. Mına aqiqaten nenen olar küreşeler".

Danılo Gaydamaha (Qara qaşlı)

Qırımnıñ qaytarıluvı: "Aqiqat yeñecek"

Qırımlı Danılo Gaydamaha Ukrayina Rusiye tarafından işğal etilgen Qırım üzerinde nezaretni keri qaytaracağına emindir. Onıñ fikrince bu tarihiy adalet meselesidir.

"Qırım mıtlaqa qaytacaq. Men işğalden evel o topraqta edim. Anda işalden soñ da bardım. Ve andaki bütün topraq daima aqiqat ve başından o yerlerde yaşağan adamlarnıñ sesi ile ayta edi. Bu sesni işğal bile susttıramamadı, o anda eşitile. Aqiqat ğayrıdan tikleniledejk, biz bunı atta duymamız. Bu mıtlaqa olacaq, çünki başqa türlü olamaz, tarih böyledir. İşğal etilgen topraqlardaki adamlarğa işğalciler olarnıñ ruhunı boysundırıp olamamalarını tileyim. Aqiqatqa ıntıluvıñıznı, sevgige ıntıluvıñıznı, içiñizdeki yarıqnı yoq etmege bermeñiz. Belki de mında bizge bu yarıqnı tutmağa qolaydır, amma biz onı siz içün de saqlap tutamız. Ve sizge de onı saqlamağa yalvaram, çünki siziñ yarıqıñız sönse, bizimiki mında büyük telüke altında qalacaq".

Danılo Gaydamaha (Qara qaşlı)

Rusiyeni ne bekley?

Ukrayinalı bloger Qara qaşlı emindir ki, Rusiye ve onıñ vatandaşları özüni yoq etmek yoluna turdı ve bu esnas Ukrayinağa istilâdan bayağı evel başlandı. Amma onıñ fikrince cenk bu esnasnı tek tezleştirir.

"Öz kelecegini er bir halq kibi ruslar da özleri saylaylar. Olar öz saylavını yaptılar ve bu endi bir çoq asır böyledir. Bu saylav olarnıñ faydasına degil - olar özüni yoq etmek yolunı özleri sayladılar. Er sefer kelecek yerine keçmişni saylağanda olar özüni yoq eteler. Olarğa az qaldı".

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net​. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.