Ukrayina Mudafaa nazirliginiñ Baş istihbarat idaresiniñ yolbaşçısı Kırılo Budanov, Rusiye ordusı Qırımğa S-500 zenit-raketa kompleksleriniñ yañı elementlerini ketirdi, dep bildire. Bu aqta Budanov ukrayin umummilliy tele marafonınıñ efirinde ayttı.
"İlhaq etilgen Qırımda eñ yañı S-500 elementleri peyda oldı. Bu bayağı tecribeli bir qullanuv olacaqtır. Amma olar anda endi peyda oldılar, – dep bildirdi Budanov.
Budanovnıñ aytqanına köre, Rusiye ordusı Keriç (Qırım) köprini şahsiy erkân ve bazı yüklerni keçirmek içün qullanmağa devam ete.
"Keriç köprü er vaqıt qullanılğan edi (Rusiye arbiyleri tarafından – QA) ve qullanıla, ve o bar olğanı qadar, o qullanılacaq. Paromlar esas yüklerni taşıy - ebet, bu doğru, amma köpürden de keçeler, ve şahsiy vagonlar er şeyden evel. Yükler daa az, amma şahsiy terkibi içün bu esas yoldır", – dep qoştı Budanov.
S-500 "Prometey" – Rusiyeniñ zenaat raketa kompleksi, onı "Almaz-Antey" konserni yañı nesil zenit raketa sistemaları olaraq işlep çıqara.
İyünniñ 12-nde Ukrayina Silâlı quvetleriniñ Baş ştabı, Aqyar civarında S-400 zenit-raketa kompleksleriniñ eki divizionına ve S-300 ZRK bir divizionına darbe endirilgenini bildirdi.
Bundan evel haber etilgenine köre, iyün 10-na keçken gecesi Ukrayina mudafaa quvetleri Canköy rayonında S-400 zenit-raketa kompleksiniñ divizionına ve Qara deñiz ve Kezlev civarında eki S-300-ge ücüm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.