Ukrayına Yuqarı Radası Birleşken Milletler, parlament ve BM aza devletleriniñ ükümetlerini, Avropa Birligi, Avropa Şurasını Rusiyeniñ Ukrayınağa qarşı cinayetlerini baqacaq mahsus halqara mahkemeni qurmağa çağırdı.
Bu qarar parlament toplaşuvında qabul etildi, dep haber ete Ukrayına Yuqarı Radasınıñ matbuat hızmeti.
«Böyle institutnıñ qurulması kerek, çünki şimdilik Ukrayınağa qarşı istilâ cinayetleri içün istilâcı memleketniñ siyasiy ve arbiy reberligini mahkemege oğratacaq mehanizm yoq», – dep aytıla qararda.
Ukrayına Yuqarı Radası bu mahsus mahkeme:
Rusiyeniñ siyasiy ve arbiy reberligini Ukrayınağa qarşı istilâ cinayetlerini yapqanı içün tahqiq etecek ve mesüliyetke çekecek yurisdiktsiyası olacaq;
Halqara ceza mahkemesiniñ Roma nizamnamesiniñ 8bis maddesinde, adiy halqara uquqta pekitilgen istilâ cinayetleriniñ tarifini qullanacaq;
Semereli kontrol yapqan ve Rusiyeniñ siyasiy ya da arbiy areketlerini idare etken şahıslarğa qarşı yurisdiktsiyası olacaq;
Apis cezalarınen bağlı halqara qararlarnı çıqarmaq vekâletleri olacaq;
Rusiye Ukrayınağa qarşı silâlı istilâsını başlatqan 2014 senesi fevral ayından berli yurisdiktsiyası olacaq.
Ukrayına Rusiye reberligini mesüliyetke çekecek mahsus mahkemeni qurmaq teşebbüsini teklif etti. Ukrayına tarafınıñ malümatına köre, böyle mahkemeniñ quruluvına Avropa Şurasınıñ Parlament assambleyası, Avropa parlamenti, NATO Parlament assambleyası, OSCE Parlament assambleyası.
Rusiyeniñ Ukrayınağa qarşı büyük ücümi başlağanından Ukrayına aq qorçalayıcalır «Putin içün mahkeme» kampaniyası çerçivesinde 18,5 arbiy cinayetni qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.