Ukrayina istihbaratçıları yaqın aylarda Keriç (Qırım) köprüne üçünci ücümni keçirip, onı bozacaq olalar, dep yaza The Guardian Ukrayina Mudafaa nazirliginiñ baş idaresindeki menbalarğa atıf etip.
Menbalarnıñ bildirgenine köre, köpürniñ yıqılması "qaçınılmaz", ve müessise başı Kırolo Budanovnıñ "bu maqsatqa irişmek içün vastalarnıñ büyük qısmı" bar.
"Bunı 2024 senesiniñ birinci yarısında yapacaqmız", - dep ayttı menbalardan biri.
Aynı zamanda, The Guardian qayd ete ki, "GUR-nıñ böyle yahşı qorulğan maqsatqa qarşı mahsus operatsiyanı keçirmek qabiliyetine dair ciddiy şübeler bar".
Keriç köprü ilhaq etilgen Qırımnı Rusiye ile bağlay. 2022 senesi oktâbr ayında Qırım (Keriç) köpründe patlav yüz berdi. 2023 senesi iyülniñ 17-nde Keriç köpründe daa bir patlav oldı. Rusiye akimiyeti patlavlarda Ukrayina ordusını qabaatlay ya da olarnı talimler dep adlandıra. Kıyiv tek bazı ücümlerde iştirak etkenini tasdıqlay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.