Donetsk vilâyetiniñ Pokrovsk şeerinde raketa ücümi neticesinde yaralanğanlarnıñ sayısı 67 oldı, dep bildirdiler Ukrayina İç işler nazirliginde.
Yaralanğanlar arasında 29 adiy vatandaş (şu cümleden 2 bala), 29 polis hadimi, 7 qurtarıcı ve 2 arbiy.
Elâk olğanlarnıñ sayısı şimdilik deñişmedi - 7 adam.
"Dağıntılarnı parçalarğa ayırmağa devam etemiz. Gece tekrar ateşke tutulma telükesi yüksek olğanı içün işlerni toqtatmaq mecbur edik", - dep yazıla bildirmede.
Avgustnıñ 7-nde Rusiye ordusı Donetsk vilâyetiniñ Pokrovsk şeerindeki mesken evge eki raketanen ücüm etken edi.
Rusiye arbiyleri Ukrayina şeerlerine muntazam şekilde ateş ete. Delillerge baqmadan, Rusiye Ukrayinada vatandaşlarğa ve arbiylerge qarşı cinayetlerde mesüliyetini inkâr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.