Rusiyeniñ Penza vilâyetindeki Wildberries logistika merkezi ve Krasnodar ülkesindeki liman Ukrayin uçucısız uçaqlarınıñ ücümine oğradı.
Penza vilâyetiniñ gubernatorı Oleg Melniçenko, Wildberries anbarına ücüm neticesinde bir insan zarar kördi, 200-ge yaqın şirket hadimi tahliye etildi, dep bildirdi. "Mında acele yardım maşnaları, yanğıncılar ve Fevqulâde vaziyetler nazirliginiñ quvetleri, uquq qoruyıcı organlarınıñ hadimleri keldi. Anbar territoriyasında açıq yanğın oldı, yanğıncılar ateşke qarşı küreşe", — dep yazdı o.
Astra qayd etkenine köre, Mastinovka köyünde yerleşken kompleks büyük dağıtım merkezi ola ve Volga federal okrugına hızmet ete.
Supernova+ ve Exilenova+ Ukrayin monitoring telegram kanalları, Taman (Krasnodar ülkesi) limanına ücüm aqqında da haber ete. "Krımskiy veter" yazğanına köre, yanğınlar "Tamanneftgaz" büyük şahsiy neft aqım kompleksiniñ yerleşken yerinde qayd etildi, onı OTEKO gruppası idare ete.
Bundan ğayrı, telegram kanallarınıñ malümatına köre, Sarapuldaki (Udmurtiya) Wildberries anbarı yanıp başladı. Yerli akimiyet şirketniñ malzemeler merkezine etilgen ücüm aqqında malümatnı şimdilik izaatlamadı.
Oraqnıñ 30-nda saba RF Mudafaa nazirligi, keçken gece ava mudafaasınıñ nevbetçi quvetleri tarafından Rusiyeniñ 9 regionı ve işğal etilgen Qırım, Azaq ve Qara deñizleri üzerinde 258 Ukrayin uçucısız uçağı yaqalandı ve yoq etildi, dep bildirdi.