Rusiye arbiyleri oktâbrniñ 23-ne keçer gecesi Ukrayinağa 176 darbe uçucısızınen ücüm etti, 92-si Shahed reaktiv dronı, dep bildirdi Ukrayina Silâlı quvetleriniñ Ava küçleri. Uçucısızlar Rusiyeniñ beş yönelişinden, işğal etilgen Donetskten ve Rusiye işğal etken Qırımnıñ Sarabuz qasabasından uçurıldı.
"İlk malümatqa köre, saat 08:00-ge qadar ava mudafaası Shahed (68-i – reaktiv), "Gerber", diger dronlar olğan 140 duşman uçucısızını urdı/bastırdı, 10 darbe uçucısızı daa avada, iş devam ete", – dep aytıla haberde.
Ava küçleriniñ malümatına köre, 19 yerde darbe qayd etildi, 13 yerde parçalar tüşti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.