Boş aynıñ 9-nda, Rusiye Federal telükesizlik hızmetiniñ (FSB) hadimleri tarafından Aqyarlı Vladimir Dudka, Dmitriy Ştıblikov ve Aleksey Bessarabovnıñ qanunsız tutulğanına doquz yıl tola. Rusiye akimiyeti olarnı Rusiye akimiyeti olarnı Qırım yarımadasındaki "obyektlerge diversiya ve terakt azırlağanlarında" qabaatladı. Bunı Qırımtatar resurs merkezi bildire.
Dmitriy Ştıblikov ve Aleksey Bessarabov 2014 senesine qadar Qara ve Hzar deñizleri havzasında milliy telükesizlik ve avroatlantik integratsiya mevzusını tedqiq etken "Nomos" ukrayin talil merkezinde arbiy ekspert olaraq çalıştılar. Olar,Qara ve Hzar deñizleri bölgesinde telükesizlik meselelerine bağışlanğan "Qara deñiz telükesizligi" ukrayin mecmuasınıñ muarririyet azaları edi. Ştyblikov ve Bessarabovnen beraber olarnıñ yaqın dostu Vladimir Dudka da apiske alındı.
Üçü de Rusiye uquq qoruyıcıları tarafından Ukrayina istihbaratınıñ emrinen Qırımda diversiya azırlağanlarında qabaatlandı. Bir afta devamında olarnıñ bulunğan yeri belli degil edi, soñra belli olğanı kibi, olarnı Bağçasaraynıñ vaqtınca izolâtorında tuta ediler, anda "itiraf ettirmek" içün elektriknen işkence ete ediler. Bundan soñ Aqyar sakinlerini Aqmescitteki SİZO-ğa avuştırdılar, anda olar üç yıldan ziyade deşetli şaraitlerde tutuldı.
Rusiye kontrolindeki Aqyar şeer mahkemesi 2019 senesi çeçek ayınıñ 4-nde "ukrayin diversantları davası"nıñ mabüsleri Vladimir Dudka ve Aleksey Bessarabovnı 14 yılğa üküm etti. Mahkeme er birine para cezasını tayin etti: Dudkağa — 350 biñ ruble, Bessarabovağa — 300 biñ ruble.
Tahqiqat vaqtında yaqalanğanlarğa mustaqil advokatlar berilmey edi. Neticede Dmitriy Ştıblikov olarnıñ hızmetlerinden vazgeçti ve qabaatını tanıdı, tahqiqat ile mahkemeden evel añlaşma tizdiler. Aq qoruyıcılarnıñ fikrince, bu, oña yapılğan basqı neticesinde ola bile.