Rusiye arbiyleri mayısnıñ 26-na keçer gecesi Ukrayinağa eki "İskander-M" ballistik raketası ve 122 darbe uçucısızınen ücüm etti, dep haber etti Ukrayina Silâlı quvetleriniñ Ava küçleri. Olarnıñ malümatına köre, dronlar Rusiyeniñ beş yönelişinden ve işğal etilgen Qırımda Sarabuz rayonından uçurıldı.
"İlk malümatqa köre, saat 08:30-ğa qadar ava mudafaası memleketniñ şimali, cenübi ve şarqında Shahed, Gerber, Italmas ve diger dronlar olğan 111 duşman uçucısızını tüşürdi/bastırdı", – dep aytıla haberde.
Ukrayina arbiyleriniñ malümatına köre, 11 yerde doquz darbe uçucısızı ve raketalarnıñ ücümi qayd etildi, üç yerde parçalar tüşti.
Rusiye Mudafaa nazirligi bu ücümni şimdilik izaatlamadı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.