Ukrayina arbiyleri ilhaq etilgen Qırımda Rusiye Federatsiyasınıñ arbiy nişanlarına ücüm etmek içün ilk sefer eñ yañı "Palânıtsâ" uzaq mesafeli raketa-dronnı qullandı. Bu aqta "UP" neşri adı bildirilmegen menbağa atıf etip yaza.
İddia etilgenine köre, silâ 2024 senesi avgust ayında qullanıldı. "Yazıq ki, bu uçaqnıñ angi obyektke qarşı qullanılğanını aytıp olamaymız, amma mürekkep ameliyat olğanını ve nişan "Palânıtsâ" tarafından muvafaqiyetnen "yıqılğanını" bilemiz", — dep aytıla haberde.
Muarririyet "UP" malümatını tasdıqlap olamay.
Avgustnıñ 24-nde Ukrayina prezidenti Volodımır Zelenskıy yañı ukrayin silâsınıñ birinci ve muvafaqiyetli qullanıluvı aqqında bildirdi. Daa soñra silânı kösterip, onı azırlamaq içün bir buçuq yıl kerek olğanını bildirdi. Qayd etilgenine köre, "Palânıtsâ" yer platformasından uçurıla, raketanıñ turbo reaktiv köçüricisi bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.