Ukrayina ava mudafaası gece Rusiye ücüm etken 25 raketanı ve 367 pilotsız uçaqnı zararsızlaştırdı, dep bildire Ukrayina Silâlı Quvetleriniñ Ava quvetleriniñ matbuat hızmeti.
Ukrayina arbiyleri 13 yerde 4 ballistik raketa ve 18 ücüm uçucısızlar urulğanını qayd etti, ayrıca 8 yerde urulğan dronlarnıñ parçaları tüşti.
Ukrayina Ava quvetleriniñ malümatına köre, kiçik aynıñ 17-ne keçken gecesi duşman Rusiye Federatsiyasınıñ Rostov vilâyetinden ve ilhaq etilgen Qırımdan dört "İskander-M" ballistik raketasınen, 20 qanatlı raketanen, idare etilgen X-59/69 aviasiya raketasınen ve Rusiye Federatsiyası ve Qırımda altı yönelişten çeşit tipte 396 ücüm dronnen ücüm etken.
Odesa şeer arbiy memuriyetiniñ yolbaşçısı Sergey Lısak, Rusiye ücüminde üç adam zarar kördi, şu cümleden bir kişi ağır alda, dep bildirdi. Onıñ aytqanına köre, o gece Odesada altı kere ava telükesi ilân etilgen edi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.