Qırımda Rusiye mahkemesi tarafından 8,5 yılğa azatlıqtan marum etilgen Ukrayina Arbiy deñiz quvetleriniñ yedek zabiti Oleksiy Kıselev endi bir qaç aftadan berli Murmanskaya SİZO-sında buluna, dep bildire Qırımtatar resurs merkezi onıñ oğlu Artemge atıf etip.
Ailesiniñ aytqanına köre, Kıselevniñ apis şaraitleri qıyın olıp qala.
Mahküm etilgen arbiyniñ oğlu, babasınen körüşüvge tek bir kere izin berilgenini qayd etti.
2022 senesi iyülniñ 30-nda belli oldı ki, iyülniñ 22-nde işğal etilgen Geniçeskte Rusiye quvetçileri Ukrayina Arbiy-deñiz quvetleriniñ "Slavutıç" istihbarat gemisiniñ sabıq komandanı Oleksiy Kıselevni yaqaladılar. Bundan soñ, arbiyniñ aytqanına köre, Rusiye quvetçileri onı işkencege oğrattı, soñra Qırımğa alıp kettiler ve SİZO-ğa yerleştirdiler.
Kıselev "Noman Çelebicihan batalyonında" iştirak etkeninde Rusiye Ceza kodeksiniñ 208-inci maddesiniñ 2-nci qısmına binaen qabaatlandı. Rusiye Yuqarı mahkemesi bu teşkilâtnı terroristik teşkilât olaraq tanıdı. Noman Çelebicihan adına batalyonınıñ tesisçisi Lenur İslâmov, Oleksşy Kıselevniñ oña alâqası bar olğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.