İsveçiyanıñ Ukrayina elçihanesi diger memleketlerniñ diplomatlarınen beraber Moskvadan kelgen qorquzuvlarğa baqmadan, Ukrayina paytahtını terk etmeycekler, dep bildirdi.
"Kyivde diplomatik temsilciklerniñ diger yolbaşçılarınen beraber biz Rusiye Tış işler nazirliginiñ Ukrayinada diplomat ve çetel vatandaşlarına yapqan qorquzuvlarnı qayğınen qabul etemiz. Rusiye Viyana şartnamesine ve halqara gumanitar uquq normalarına riayet etmek zorunda. Biz Kyivde qalamız", – dep aytıla oktâbrniñ 5-nde aydınlatılğan İsveçiya diplomatik temsilciliginiñ haberinde.
Almaniya, İtaliya, İspaniya, Frenkistan, Belçika ve diger memleketlerniñ elçihaneleri aynı beyanatta bulundı.
AB elçisi Katarina Maternova oktâbrniñ 4-nde bildirgenine köre, Rusiye Ukrayinağa, hususan paytahtına büyük darbeler endirmege devam etecegini aytsa da, Avropa Birliginiñ Temsilciligi Kyivde qala.
Oktâbrniñ 4-nde Poloniya Tış işler nazirligi de diplomatik temsilciligi aqqında aynı malümat berdi.
Keçken afta Rusiye Tış işler nazirligi çetel vatandaşları ve diplomatik temsilciliklerniñ hadimlerini Ukrayinada, hususan Kyivde bulunmaq telükeli olğanı aqqında tenbilep, şeerge Rusiye arbiy obyektlerine qarşı Ukrayina ücümlerine cevap olaraq yañı "kütleviy darbeler" endirilecek, dep bildirdi.
"Rusiye Tış işler nazirligi çetel vatandaşlarını, şu cümleden diplomatik missiyalarnıñ hadimlerini Ukrayinada bulunmaq ve anda barmaqtan vazgeçmeli, dep tekrar tenbiley. Ola bilecek menfiy aqibetlerniñ mesüliyeti bu tenbige qulaq asmağanlarğa aittir", – dep bildirdi Rusiye Tış işler nazirligi.
Moskva mayısta da aynı tenbilerini aytqan edi, amma memleketlernini liderleri Rusiye qorquzuvlarını red etti.
Oktâbrniñ 3-nde prezident Volodımır Zelenskıy Reuters agentligine bergen intervyüsında Rusiyeniñ Kyiv ve diger şeerlerniñ sakinlerini ketmege mecbur etmek içün yapqan darbelerine cevap olaraq Ukrayina Silâlı quvetleri Rusiye cermay zavodlarına qarşı darbelerni quvetleştirecek.