Yanvarniñ 8-nde saba Rusiye quvetleriniñ kütleviy ücümi neticesinde 38 insan zarar kördi, dep bildire Ukrayina Milliy polisiniñ matbuat hızmeti.
''Dört insan elâk oldı, 38 yaralandı. Milliy polits RF ordusınıñ Ukrayinağa qarşı nevbetteki raketa ücüminiñ aqibetlerini belgiley'', - dep yazıla haberde.
Ukrayina uquq qoruyıcılarınıñ malümatına köre, yanvarniñ 8-nde saba RF Harkiv, Dnipropetrovsk, Zaporojjâ ve Hmelnıtsk vilâyetlerine ücüm etti.
"Saat 12:00-ge qadar dört ölü aqqında belli. Mesken evler, infraterkip obyektleri, naqliyat vastaları zarar kördi. Polis hadimleri urulğan yerlerde çalışa, insanlarğa yardım ete, Rusiyeniñ arbiy cinayetlerini belgiley'', - dep haber ete NPU.
Hususan, Dnipropetrovsk vilâyetinde Krıvıy Riğ, Novomoskovsk ve Krıvoroğ rayonınıñ Nadejda köyüne endirilgen raketa darbeleri neticesinde bir insan elâk oldı ve 28 yaralandı, şu cümleden dört bala zararlandı. Şahsiy evler ve grajdan infrastruktura zarar kördi.
''Rusiye ordusı Zaporojjâ şeerine raketalarnen urdı. Beş insan yaralandı. Bundan ğayrı, eki çoq qatlı ev, araba ve grajdan infrastruktura zarar kördi. Harkiv ve Zmiyev şeerlerinde Rusiye ücümleri neticesinde bir insan elâk oldı, beş tınç sakin yaralandı, eki şahsiy ev, regional zenaat merkezi zararlandı'', - dep bildire ukrayin polisi.
Ukrayina uquq qoruyıcıları, Hmelnıtskta Rusiye ücümi neticesinde eki insan elâk oldı, çoq qatlı ev zarar kördi, dep bildire.
''Harkivde yanvarniñ 8-nde saba eñ azdan dört patlav oldı. Zarar körgen müessise, oquv yurtu. Yaralanğan 53 yaşında qadın, alı ağır degil. Yaralanğan kişi hastahanege alındı'', - dep bildirdi uquq qoruyıcılar.
Yanvarniñ 8-nde gece ve saba Rusiye arbiyleri Ukrayina territoriyasına 51 çeşit raketa ve "Shahed-136/131" tipindeki sekiz ücüm dronnı qullanıp, kene de kütleviy bir raketa darbesini yaptılar, bunen beraber, altı "İskander-M" ballistik raketa işğal etilgen Qırımnıñ Canköy rayonından ve Çauda burnundan uçurıldı.
Rusiye arbiyleri işğal altındaki Ukrayina topraqlarını, şu cümleden mülkiy obyektlerni muntazam sürette ateşke tuta. Delillerge baqmadan, Moskva bu darbelerniñ maqsadı Ukrayinanıñ arbiy infraterkibi olğanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.