Cumaaqşamı künü, dekabrniñ 6-nda, Ukrainada Silâlı quvetler künü qayd etile.
Bu aqta Ukraina prezidenti Petro Poroşenko içtimaiy ağlardaki saifelerinde bildirdi.
«Ukrainağa sadaqat kösterip hızmet etken, Rusiye istilâcısına qarşılıq köstergen, devletimizniñ er bir vatandaşına, bütün ukrain halqına ğurur bergen er bir asker ögünde baş egem», – dep yazdı Poroşenko.
Onıñ aytqanına köre, Ukraina askerleri sayesinde «yüzlernen Ukraina şeeri ve on biñlernen köy ve qasabalar barışıq içinde yaşaylar».
«Yalıñız ukrain degil – bütün Avropa medeniyetiniñ qalqanını sıqı tutasıñız», – dep qoştı Ukraina devletiniñ yolbaşçısı.
Ukraina Silâlı quvetleri künü – Ukraina Silâlı quvetlerine bağışlanğan bayram künüdir. 1993 senesi Yuqarı Radanıñ qararınen belgilendi, raatlıq künü degil.
Er yıl dekabrniñ 6-nda qayd etile – 1991 senesi «Silâlı quvetler aqqında» Ukraina qanunı qabul etilgen edi.