Ukrainada Rusiye istilâsı başlağanından berli 130 biñ insandan çoq köçmege mecbur olğanlar olaraq qayd etildi. Bu aqta martnıñ 30-nda Ukraina içtimaiy siyaset naziri Marina Lazebnaya bildirdi.
Bundan ğayrı, onıñ malümatına köre, aman-aman 1,6 million insan köçip kelgenler aqqında malümat bazasında bar.
«Evini terk etmege mecbur olğan er kesten yaşağan cemiyette qayd olmağa rica etem… Bu er bir regionda köçip kelgenlerniñ «içtimaiy vaziyetini» añlamağa, ihtiyaclarına doğru qıymet kesmege ve yardımnı planlaştırmağa yardım eter», – dep qayd etti içtimaiy siyaset naziri.
BM qaçaqlar işleri yuqarı komissarınıñ martnıñ 20-nde olğan malümatına köre, 10 million insan – ealiniñ tahminen çerigi – Rusiye istilâsından sebep Ukrainadaki evlerini terk etti.
Martnıñ 21-nde Ükümet Ukrainada cenk areketlerinden sebep evlerini terk etip, köçip kelgenlerge devlet aylıq 2 biñ ğrıvnâ töleycek, dep bildirdi.
Martnıñ 25-nde Ukraina prezidenti Volodımır Zelenskıy köçip kelgenler içün vaqtınca mesken qurucılığını ilân etti.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.