Ukraina ve Türkiye Tin başları Dmıtro Kuleba ve Mevlüt Çavuşoğlu Qara deñizde telükesizlik vaziyetini ve "Qırım platforması"nı muzakere ettiler. Bunı Ukraina TİN-niñ matbuat hızmeti haber etti.
"TİN başları, Qara deñiz bölgesindeki telükesizlik vaziyetine, hususan bu sene "Kvadriga" formatında Ankarada Ukraina ve Türkiyeniñ tış siyaset ve mudafaa nazirlikleriniñ reberleri seviyesinde siyaset ve telükesizlik mevzusında mesleatlaşmalarnıñ azırlanmasına diqqat ayırdılar. Dmıtro Kuleba ve Mevlüt Çavuşoğlu deñiz quvetleri arasında em eki taraflı, em çoq taraflı formatta işbirliginiñ quvetleştirilmesini muzakere ettiler dep yazıla bildirmede.
"Qara deñiz memleketlerden biriniñ tecavuzkâr areketleri içün yer olmamalı. Ukraina ve Türkiye bu maqsadğa irişmek içün sıq işbirlik ete, - dep qayd etti Kuleba.
Taraflar "Qırım platforması" çerçivesinde işbirlikni muzakere ettiler, işğal etilgen yarımadada insan aqları vaziyetine diqqat ayırmaq ve areketleri koordinatsiya etmege añlaştılar.
Çavuşoğlu öz Twitter saifesinde Türkiye Ukraina topraq bütünligini desteklegenini bildirdi.