Ukraina-Beyazrusiye sıñırı rayonında körüşken Ukraina ve Rusiye eyyetleri «ateş ve cenk areketleriniñ tez toqtatılması içün añlaşa bilecek meselelerni tapmaq maqsadınen» muzakerelerniñ birinci raundını keçirdi. Bu aqta fevralniñ 28-nde Ukraina prezidentiniñ matbuat hızmeti haber etti.
Qayd etilgenine köre, taraflar «er kes razı olacaq qararlar» azırlanacaq «esas mevzularnı» muzakere etti.
«Devletlerniñ paytahtlarında qoşma mesleatlarğa acele çıqmağa qarar alındı. Bundan soñ eñ yaqın vaqıtta Ukraina ve Rusiye taraflarınıñ muzakereleriniñ ekinci raundı keçmeli», – dep aytıla haberde.
Körüşüvde olğan Prezident ofisi yolbaşçısınıñ buhranlar ile küreş mesleatçısı Mıhaylo Podolâk Ukraina ve Rusiye eyyetleriniñ muzakereleri qıyın edi, dep bildirdi.
«Muzakereler qıyın. Amma bir de bir mecburiy ultimatum artıq yoq. Ne yazıq ki, Rusiye tarafı başlatqan bozucı esnaslarına tarafsız baqıp olamay», – dep yazdı Podolâk Twitterde.
Ukraina prezidenti Volodımır Zelenskıynıñ ofisi muzakerelerden evel Kyiv ateşniñ acele toqtatılması ve Rusiye ordusınıñ Ukrainadan çekilmesini talap etecek, dep bildirdi.
Rusiye eyyetiniñ yolbaşçısı Vladimir Medinskiy mümkün olğanı qadar tez añlaşmağa ümüt ete, dep aytqan edi. Amma Rusiye talapları seslendirilmedi.
Körüşüv Moskva Ukrainağa sebepsiz başlatqan ücümi sebebinden ve Harkiv ve Çerniğiv şeerleri Rusiye ordularınıñ ateşine oğrağanına dair haberler kelgende Ğarpnıñ iqtisadiy sanktsiyalarınıñ tesirlerine oğrağanda keçirildi.
Ukrainada cenk vaziyeti devam ete. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net.