Moskva qanunsız Qırım işğalini normalleştirmek ıntıluvlarında muvaffaq olmaq fırsatlarını coydı. Bu aqta Ukraina Tış işler naziri Dmıtro Kuleba bildirdi.
«Bunıñnen beraber, insan aqlarınıñ bozuluvı ve Qırımnıñ askeriyleştirilüvi Kremlge qarşı basqı quvetleştirilüvini talap ete, işğal toqtatılsın ve vaqtınca işğal etilgen yarımada Ukrainağa qaytarılsın», – dep aytıla Ukraina Tış işler naziriniñ Twitter haberinde.
Ukraina Tış işler naziri Dmıtro Kulebanıñ bildirgenine köre, Ukraina ve Rusiye prezidentleri Volodımır Zelenskıy ve Vladimir Putinniñ Qırımda körüşüvi yarımada Kyiv kontroline qaytqan soñ kerçekleştirile bile.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.