Ukraina Tış işler nazirligi işğal etilgen Qırımda Rusiye mahkemesi tarafından advokat Emil Kürbedinovnıñ apiske alınmasına qarşı narazılıq bildire.
Ukraina Tış işler nazirliginiñ saytında derc etilgen resmiy beyanatta qayd etilgeni kibi, Kürbedinov «Rusiye tarafından uydurılğan ve siyasiy sebeplerden açılğan davalar boyunca qanunsız tutulğan Ukraina vatandaşlarınıñ müim advokatlarından biri ola».
Ukraina Tış işler nazirliginiñ beyanatında qayd etile ki, Kürbedinov Rusiye FSBsi tarafından zapt etilgen ukrain askerlerinden biriniñ imayecisi ola, bu da «tutulmasınıñ sebebi ola bile».
«Rusiye işğalcileri advokat ve aq qorçalayıcılarnı ilk sefer taqip etmey. Noyabr ayında Emil (Kürbedinov – QA) ve eki zenaatdaşı, Lilâ Gemeci ve Edem Semedlâyev, «numayışlar qanunlarınıñ bozulmaycağı» aqqında sebepsiz «ihtar» alğan ediler», – dep qayd etti Ukraina nazirligi.
Nazirlikniñ qayd etkenine köre, Rusiye mahkemesi tarafından Kürbedinovğa aydınlatılğan qabaatlar «sebepsiz ve uydurılğan».
«Rusiye Ukraina vatandaşlarını – Rusiyede ve işğal etilgen topraqta siyasiy sebeplerden tutulğan siyasiy mabüslerni – Kremlniñ ukrain esirlerine qoltutqan ve mahkemelerde imaye etkenlerni qorqutıp ve basqı yapıp, imaye aqqından marum etecek ola. Böylece, Rusiyede muhalifet faallerini «bitirmek içün» qullanılğan memuriy cezalar tecribesi işğal etilgen Qırımğa keçe», – dep qayd ete Ukraina Tış işler nazirligi.
Ukraina nazirligi Rusiyeni bunı «acele toqtatmasına» ve 2014, 2016, 2017 seneleri qabul etilgen BM Baş Assambleyasınıñ rezolütsiyalarını, em de Halqara mahkemeniñ Ukrainanıñ Rusiyege qarşı davasında 2017 senesi qabul etilgen ayrı tedbirler qararını yerine ketirmesine çağıra.
Ukraina Tış işler nazirligi halqara toplulıqnı «Qırım işğalden qurtulğanına ve Rusiyede qanunsız tutulğan ukrainalılarnıñ azat etilmesine qadar istilâcı memleketke siyasiy-diplomatik ve sanktsiyalar basqısını quvetleştirmege» çağırdı.
Dekabrniñ 7-nde Kreml kontrolindeki Aqmescitniñ Kiyev rayon mahkemesi qırımlı advokat Emil Kürbedinovnı 5 künge tevqif etti.
Qararnı qadı Anton Tsıkurenko seslendirdi. Kürbedinov 2013 senesi Facebookta paylaşqanları içün Rusiye Memuriy cinayetler kodeksiniñ 20.3 maddesi boyunca (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) apiske alındı. Kürbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
Kürbedinovnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kürbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Emil Kürbedinovnıñ advokatı Aleksey Ladin Aqmescitniñ Kiyev rayon mahkemesinde çıqışta bulunıp, cinayet olmağanı içün dava qapatılmalı, dedi. Ladin 2013 senesi Qırımda «Ukraina uquqı bar edi, oña köre bu timsaller yasaq altında degil. Cinayet işlemek kibi bir niyet de yoq edi», dep hatırlattı. Mahkeme adise eski olğanına baqmadan, memuriy davanı qapatmaq muracaatını red etti.
Your browser doesn’t support HTML5
12 imayeci ve altı saat mahkeme: Kürbedinovnıñ davası nasıl baqıldı (video)
Emil Kürbedinovnıñ davasında şaatlardan biri Rusiye FSB hadimi Andrey Suşko ola. O, qırımtatar faali Renat Paralamovnıñ hırsızlanması ve azaplanmasında iştirak etken edi.
Keçenleri Suşko Paralamovnı hırsızlağanında şeklenip, ABD sanktsiyalar cedveline kirsetilgen edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.