Rusiyeniñ gece raketa ücümi neticesinde Ukrayinada dört issilik elektrostantsiyası ve hastahane zarar kördi. Zarar körgenler de bar.
"Duşman kene kere Ukrayinanıñ energetik obyektlerine kütleviy şekilde ateş açtı. Tünevin gece ücüm neticesinde DTEK-niñ dört issilik elektrik stantsiyası zarar kördi. İlk malümatqa köre, teessüf ki, zarar körgenler bar", - dep bildirdi ücüm etilgen TES şirketiniñ energetik şirketi DTEK. Şirket, zarar körgenler bar, olarğa yardım kösterile, dep yazdı.
Ukrayina Energetika nazirliginiñ yolbaşçısı Herman Galushenko, obyektlerden birinde energetik yaralanğanını bildirdi. Başqa zarar körgenler aqqında malümat yoq.
Raketalar Harkivniñ hastahanesine de uruldı, dep bildirdi şeer başı İgor Terehov. Atış neticesinde bir hasta parçalanğan yara aldı. "Yazıq ki, raketalar tibbiy müessiseniñ korpusına degil de, topraqqa tüşti", - dep yazdı Terehov. Onıñ malümatına köre, atış vaqtında tibbiy kompleksde biñden ziyade insan bar edi: 900 hasta ve 250 hastahane hadimi.
Terehovnıñ aytqanına köre, patlav dalğası tibbiy kompleksniñ camlarını sındırdı, damlarnı, elektrik, suv borusı ve diger müendis kommunikatsiyalarını bozdı.
Ukrayina Ava quvetleriniñ malümatına köre, aprelniñ 27-ne keçken gecesi Rusiye Ukrayinağa qarşı 34 raketa attı, olardan 21-ni urıp tüşürdiler. Rusiye Mudafaa nazirligi ücümni izaatlamadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.