Ukrainanıñ işğal etilgen topraqlarnıñ reintegratsiya meseleleri nazirligi bildire ki, «cemaatçılıq ile elektron mesleat» keçirmek içün qırımtatar tilini inkişaf ve populârlaştıruv kontseptsiyasınıñ leyhasını aydınlattı.
«Merkeziy ve yerli akimiyet organlarınen keliştirip bitirilgen soñ leyha Ukraina Nazirler şurasına siyasiy teklif olaraq berilecek», – dep aytıla nazirlikniñ haberinde.
Müessise yolbaşçısı Oleksiy Reznikovnıñ bildirgenine köre, kontseptsiya üzerindeki iş vaqtında «mütehassıslarnen onlarnen mesleat keçirildi».
«Qırımtatar tiline tek unikal mirasnı saqlav kerekligi ceetinden legil, nesil-nesilden keçecek ve zemaneviy dünyada bildirme vazifelerini al etecek canlı tilge olaraq yanaşmağa tırıştıq», – dep bildire Reznikovnıñ aytqanlarını nazirlikniñ matbuat hızmeti.
Haberde aytılğanına köre, elektron mesleatlar aman-aman bir ay sürecek. Yazma teklif ve tüzetüvler 2021 senesi fevralniñ 22-ne qadar qabul etile: yakymenko@mtot.gov.ua. kontseptsiya leyhası mında bar.
2023 senesine qadar Qırımtatar tilini inkişaf ve populârlaştıruv kontseptsiyası azırlanğanını Reznikov daa evel de bildirgen edi. Onıñ hatırlatqanına köre, Ukraina reintegratsiya nazirligi Google LLC korporatsiyasına muracaat etip, qırımtatar tilini Google Translate servisine kirsetmege rica etti. Nazirlik Duolingo şirketine – çetel tillerini ögrenüv platformasına muracaat etip, olarnıñ servisi esasında qırımtatar tili kursını başlatmağa teklif etti.