Ukrainanıñ vaqtınca işğal etilgen topraqlarnıñ reintegratsiya meseleleri naziriniñ muavini İnna Golovançuk vaqtınca işğal etilgen topraqlar ile sıñırlarda, hususan Qırım ve Herson vilâyetiniñ memuriy sıñırındaki kontrol-keçiş noqtalarınıñ hızmet merkezlerindeki tibbiy noqtalarında COVID-19 testlerini bedava yapmaq planları aqqında tarif etti. Bu aqta o, «İnterfaks-Ukraina» agentligine bildirdi.
«Karantin sıñırlavları devam etse, (Ukraina ükümetiniñ kontroli altındaki – QA) kirişinde testler yapılacaq. Şimdilik er kes içün öylemi olacaq ya da tek alâmetleri olğanlar içünmi aytıp olamayım, amma bu mıtlaq olacaq şey», – dep qayd etti nazir muavini.
O, bu hızmet yılnıñ soñuna qadar peyda olur, dep ümüt ete.
SEE ALSO: Qırımlılarnıñ mektüpleri: Karantin vaqtında Aqmescitten Kyivge barmaqBundan evel nazirlik yarımadada koronavirus yuqunçınıñ tarqaluvı vaziyeti daa beter olğanı ve ilâclar yetmegeni içün Ukraina akimiyeti Qırımnıñ memuriy sıñırında gumanitar lagerlerini açmağa azır, dep bildirgen edi.
Kreml kontrolindeki Qırım parlamenti baş naziriniñ birinci muavini Yefim Fiks Qırımğa ve onıñ sakinlerine koronavirus ile küreşte Kyivniñ yardımı kerekmey, dep ayttı.
Keçken künü Qırımda 225 koronavirus hastası qayd etildi. Qırımda pandemiya vaqtında 10212 insan tüzeldi. Qırım sağlıq nazirliginiñ malümatına köre, bu yuqunçtan epidemiya vaqtında 252 kişi vefat etti. Yılnıñ başından Aqyarda 4037 insan yañı koronavirus yuqunçına oğradı. 3470 kişi tüzeldi, 109 insan vefat etti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».