Ankara Rusiyeniñ Qırım ilhaqını qabul etmedi ve qabul etmeycek, qırımtatarlarğa ise qol tutmağa devam etecek. Bu aqta Türkiye prezidenti Recep Tayyip Erdoğan Ukraina prezidenti Volodımır Zelenskıy ile keçirgen matbuat konferentsiyasında ayttı.
«Ukrainanı regionımızdaki telükesizlik ve istiqrarlıq ceetinden müim memleket olaraq köremiz. Bu çerçivede suverenitet ve Qırımnen beraber topraq bütünligine qol tuttıq ve qol tutacaqmız. Türkiye Qırım ilhaqını qabul etmedi ve etmeycek», – dep qayd etti Erdoğan.
Onıñ bildirgenine köre, Türkiye Cumhuriyeti Ukraina devlet organlarınen beraber qırımtatarlarğa qol tutmağa devam etecek.
«Şimdi qırımtatar qardaşlarımız içün ev leyhasını kerçekleştirmek ve Kyivde cami qurmaq içün iş yapıla. Bugünki muzakerelerde bu meselelerni muzakere ettik», – dep qayd etti o.
Volodımır Zelenskıynıñ aytqanına köre, Türkiye prezidenti ukrainalı siyasiy mabüslerni azat ettirmek içün küçüni sarf etmege devam etecek.
«Türkiyeniñ Ukraina suvereniteti ve topraq bütünligine qol tutması bizim içün pek müim. Prezident Erdoğan siyasiy mabüsler – ukrain ve qırımtatarlarnı – azat etüv meselelerinde faal şahsiy ğayretini kösterecek, dep işandırdı», – dep qayd etti Volodımır Zelenskıy.
Ukraina ve Türkiye prezidentleriniñ oktâbrniñ 16-nda aydınlatqan beyanatlarında Ankara yarımadanı işğalden qurtaruv Qırım platforması çerçivesinde Ukraina ile işbirligi yapmağa azır, dep aytıla.