Türkiye Birleşken Milletler Teşkilâtında Qırımnıñ Rusiye tarafından işğalini tanımağanını ve qırımtatar halqına qoltutqanını bildirdi.
“Qırımnıñ qanunsız işğalini tanımama siyaseti biz içün printsipial mesele. Qırımtatarlarnı öz ana-baba toprağında serbest ve telükesiz yaşamaq istegini desteklemege devam etecekmiz”, – Türkiyeniñ BMT-daki miyassisınıñ Twitterdeki bildirmesinde yazıla.
Aynı zamanda, Türkiye “Ukrainanıñ halqara seviyede tanılğan sıñırlarında suvereniteti, mustaqilligi ve topraq bütünligini desteklegeni ve bu bütün bölgede barışıq, telükesizlik ve turğunlıq içün müim olğanı” aqqında yazıla.
.@Turkey_UN @UN General Assembly: We fully support Ukraine’s sovereignty, independence and territorial integrity within its internationally recognized borders, which is essential for peace, security and stability in the wider region. pic.twitter.com/FaGNfPTefm
— Turkish Mission to the UN (@Turkey_UN) February 24, 2021
BMT Baş Assambleyasında fevralniñ 23-nde Ukrainanıñ vaqtınca işğal etilgen topraqlarındaki, hususan Rusiye işğal etken Qırım yarımadasındaki vaziyetnen bağlı munaqaşalar keçirildi.
Serğiy Kıslâtsâ, işğal altındaki Rusiye akimiyeti «ukrainler ve yarımadanıñ tamır ealisi olğan qırımtatarlarnıñ kimliklerini yoq etmege tırışa», dep bildirdi Birleşken Milletlerde.
Rusiyeniñ BM yanındaki daimiy vekiliniñ birinci muavini Dmitriy Polânskiy Ukrainanıñ vaqtınca işğal etilgen topraqlarındaki vaziyetke dair munaqaşalarnı «oñaytsız levha» dep adlandırıp, Ukraina Qırım yarımadasınıñ sakinlerini «qaytarmaz», dedi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.