Twitter mikrobloglar ağı Rusiye TİN-niñ Aqmescitteki temsilciliginiñ saifesini tasdıqladı. Bu, mavı tasdıqlav işareti peyda olğan Rusiye müessisesiniñ saifeçinden belli oldı.
Ukraina TİN birinci muavini Emine Ceppar buña “qabul etilmez” dedi.
"Dünya toplulığı ve BMT-niñ bir çoq azası Qırımnıñ işğalini tanımağanda ve Qırım bu Ukraina olğanını açıq-aydın bildirgende, Qırımdaki Rusiye TİN saifesiniñ tasdıqlavı qabul etilmez, dep qayd etemiz", - dep yazdı o.
Dünya toplulığı ve BMT-niñ bir çoq azası Qırımnıñ işğalini tanımağanda, Qırımdaki 🇷🇺 TİN saifesiniñ tasdıqlavı qabul etilmez, dep qayd etemiz #CrimeaIsUkraine. @twitter -ni bu saifeni deral blok etmege çağıramız! pic.twitter.com/Wxdw2xYasD
— Emine Dzheppar (@EmineDzheppar) February 8, 2021
Twitter, Qırımdaki Rusiye nazirliginiñ saifesini ne içün tasdıqlağanını açıq tefsir etmedi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.