ABD prezidenti Donald Trump Ukrayina prezidenti Volodımır Zelenskıynıñ Rusiye lideri Vladimir Putinge açıq mektübini izaatladı.
"Körüşüv aqqında laf etkenlerine quvanam. Buña alâqamız olğanına quvanam. Körüşseler, yahşı olur edi. Bunı yapmaq kerekler", – dedi o.
Ukrayina prezidenti Volodımır Zelenskıy iyünniñ 4-nde aqşam Rusiye prezidenti Vladimir Putinge açıq mektübini aydınlatıp, "körüşüvniñ tam kününi" belgilemege teklif etti.
Zelenskıynıñ qayd etkenine köre, şimdiki cebe çizgisi – "diplomatiyanıñ başlaması kerek olğan çizgidir". O, Ukrayinanıñ muzakere vaqtında ateşni bütünley toqtatmağa azır olğanını bildirdi, çizgide ateş toqtatılğanınıñ monitoringini Amerika Birleşken Devletleri temin ete bile.
Onıñ qayd etkenine köre, Ukrayina "er kesni er keske" şeklinde cenk esirlerini deñişmege azır, ve cenk vaqtında çıqarılğan vatandaş ve balalarnı qaytarmaq içün ciddiy adımlar atmaq kerek, dep hatırlattı.
Tış işler naziri Andriy Sıbiğa bildirgenine köre, bu mektüp resmiy şekilde diplomatik kanallardan berilecek.
Kreml matbuat kâtibi Dmitriy Peskov bildirgenine köre, Putinge Zelenskıynıñ mektübi aqqında haber etilecek. Onıñ qoşqanını köre, "Zelenskıy Putinnen körüşmege istese, Moskvağa kele bile", dep haber ete Rusiye devlet kütleviy haber vastaları.
Kreml böyle körüşüv Moskvada ola bile, dek teklif etken edi. Ukraiyna tarafı bunı red ete. Zelenskıy Moskvada körüşüv keçirmek teklifi muzakere esnasını sozmaq içün yapıla, dep bildirdi.
Bunıñ yerine Ukrayina bitaraf bir yerde körüşmege teklif etti. İsviçre, Türkiye kibi memleketler aytıldı.
Moskva Ukrayinada ateş toqtatıluvınıñ şartı olaraq bütün Donetsk vilâyetinden Ukrayina ordusınıñ çıqarıluvını ayta.
Rusiye vekilleri bu mevzu bıltır avgust ayında Anchoragede ABD ve Rusiye prezidentleriniñ körüşüvi vaqtında muzakere etildi, dep ayta. Kreml "Anchorage keyfi" ya da "Anchoragede olğan añlaşma" Ukrayinadaki çezüvniñ temeli olmalı, dep ima ete.
Mayısnıñ 12-nde ABD prezidenti Donald Trump jurnalistlerniñ suallerine cevap berip, Rusiye lideri Vladimir Putinnen Rusiye bütün Donbasnı alır dep aytılmadı, dep bildirdi.
Ukrayina akimiyeyeti Donbasnı Rusiye kontroline bermege razı olmay.