Avropa liderleri bu afta Amerika Birleşken Devletlerini ziyaret etip, Ukrayinadaki cenkni nasıl bitirmek mümkün olğanını muzakere etecekler, dep bildirdi Amerika prezidenti Donald Trump. Bu aqta o, jurnalistlerge New Yorktaki US Open tennis turnirinden Washingtonğa qaytqan soñ ayttı.
«Bazı Avropa liderleri memleketimizge bazarertesi ve salı künü ayrı-ayrı kelecekler. Bunı çezecekmiz», – dep ayttı o, angi Avropa siyasetçileriniñ ABDge kelecegini aytmayıp.
O, «pek tez», kelecek bir-eki kün içinde, Rusiye Federatsiyasınıñ prezidenti Vladimir Putinnen laf etecek, dep ilân etti ve cenkni bitirüv ğayretleri muvafaqiyetli olur, dep eminligini bildirdi.
«Bunı – Rusiye ve Ukrayina arasınad vaziyetni –(çezmege – QA) azırlanamız. Eminim, bunı yaparmız», – dep ayttı Trump.
O, Putinden «közü qaytqanını» kene ayttı. ABD prezidentiniñ aytqanına köre, em o, em birinci ledi Melaniya Trump «bu manasız cenk devam etkenine yazıqsına», çünki onıñ Rusiye ve Ukrayinanı cenkni toqtatuv muzakerelerine razı olmaq ğayretleri muvafaqiyetsiz ola:
«Beklegenim kibi, bitirilmesi eñ qolay olacaq cenk Putin sebebinden eñ zor oldı».
Trump Rusiyege qarşı sanktsiyalarnıñ «ekinci etapına» keçmege azır, dep bildirdi.
ABD prezidenti qayd etkenine köre, cenkni toqtatmağa istey ve Rusiye ve Ukrayina uzlaşuvlarğa razı olmaq kerek. Taraflar arasında büyük zıddiyetler qala – cenk bitken soñ topraq ve telükesizlik kefaletleri meselelerinde.
ABD memuriyeti Rusiyege qarşı sanktsiyalarnıñ quvetleştirmesinde aşıqmağanını Moskva muzakerelerden çıqar ve cenk belli olmağan vaqıtqa qalır, dep añlattı.