ABD prezidenti Donald Trump Rusiye prezidenti Vladimir Putinnen subetini "pek yahşı" dep adlandırdı, dep yaza Azatlıq Radiosı.
"Prezident Putinnen pek yahşı subetim oldı. Bizim tarafımızdan, onıñ tarafından pek çoq insan bağda edi. Ukrayina aqqında laf ettik – bu soñsuz bir küreş", – dedi o, Beyaz saraydaki matbuat konferentsiyasında.
Trump kene Putin ve Ukrayina prezidenti Zelenskıy arasında "büyük bir nefret" aqqında ayttı.
"Olar añlaşıp olamaylar, ğaliba. Amma bu meselede müsbet bir subet oldı, dep tüşünem. Ve biz Yaqın Şarq aqqında laf ettik, ve o, faydalı olmağa istey. Men siz Ukrayina ve Rusiye arasında cenkni bitirip, daa faydalı olur ediñiz, dep ayttım. Bu daa faydalı olur edi. Amma pek yahşı subetimiz oldı, ve o, kontstruktiv olmağa istey", – dep qoştı ABD prezidenti.
Trump jurnalistlernen subetleşip, ABD cermay ile bağlı bazı memleketlerge qarşı sanktsiyalarnı lâğu etecek, dep bildirdi. Angi memleketler aqqında aytılğanını aydınlatmadı.
Kreml Trump ve Putin subet vaqtında Ukrayina ve İran zıddiyetleri içün çezüv yollarını muzakere ettiler, dep bildirdi. Putinniñ yardımcısı Yuriy Uşakov aytqanına köre, Rusiye prezidenti Trumpqa "Rusiye ordusınıñ muvafaqiyetli ilerilemesini" Ukrayinanı muzakerelerge celp etecek bir faktor olaraq tarif etti.
Aynı vaqıtta, bugün Ukrayina Silâlı quvetleriniñ baş komandanı Öleksandr Sırskıy Ukrayina Silâlı quvetleriniñ faal areketleri Rusiye ordusını planlaştırılğan operatsiyalarnıñ künlerini deñiştirmege mecbur ete. Onıñ malümatına köre, Ukrayina ordusı bir ay içinde Rusiye ordusı bu vaqıt devamında zapt etken Ukrayina toprağınıñ daa büyük qısmında kontrolini ğayrıdan tikledi – bu 2024 senesi Kursk operatsiyası vaqtından ilk sefer oldı.
Trump ve Putin Ukrayinanı keçken sene de çoq muzakere ettiler, amma bu 2026 senesiniñ ilk subeti oldı.
ABD ve İsrail İranğa qarşı operatsiyalarını başlatqan soñ Rusiyeniñ Ukrayinağa qarşı cenkini bitirüv ğayretleri yavaşladı. Ukrayina prezidenti Volodımır Zelenskıy bu aftağa planlaştırılğan Ukrayina, ABD ve Rusiye vekilleriniñ üç taraflı körüşüvi başqa vaqıtqa qala, dep bildirdi.