Aqmescitteki ekinci "Hizb ut-Tahrir davasınıñ" mabüsi Tofik Abdulgaziyevniñ ömür arqadaşı Facebook saifesinde sağlığı birden fenalaşqanını ve Rusiye apishanesinde tibbiy teşkerüv vaqtında basqı yapıluv ihtimali aqqında yazdı.
Onıñ aytqanına köre, fevralniñ 27-nde Çelâbinskniñ Rusiye Metallurgiçeskiy rayon mahkemesinde Abdulgaziyevni sağlıq vaziyeti sebebinden azat etüv oturışuvı olacaq edi. Lâkin oturışuv başında onı mahkeme salonından çıqardılar, "areketleri uyğun degil eken".
Telefon subeti vaqtında Abdulgaziyev mahkeme ögüne onı apishane ekimleriniñ konsiliumına çıqardılar, dep tarif etti.
"Tofik mahkemeden bir kün ögüne onı apishane ekimleriniñ konsiliumıra çıqardılar, dep haber etti. Mahkeme isteginen apishane hastahanesiniñ ekimleri Tofikniñ bugünki sağlıq vaziyeti aqqında qarar berecek ediler. Aqayımnıñ aytqanlarına köre, ekimler toplaşuvında FSB hadimleri de bar edi. Teşkerüv başlatmayıp, STB-3 tibbiy reberi Olga Anvarovna Angold Tofikke vesiqalar berip, olarnı imzalamaq kerek, dep ayttı. Ömür arqadaşımnıñ közleri oquyamaycaq qadar yaramay körgeni içün seslendirmege rica etti. Tibbiy bölük reberi red etip qoştı: "İmzala, soñra bilirsiñ". Tofik imzalamağa razı olmayıp, oqusınlar dep israr etti. Aqayı aytqanına köre, oña koloniya hadimleri maneviy basqı yapıp başladı. Tofik tibbiy bölük reberi Angoldniñ munasebeti bu körüşüvden evel olğan munasebetten pek farqlı edi. Qadın sert ve qaba yanaştı. Böyle munasebetten Tofik nervalanıp başladı, buña da böyle cevap eşitti: "Yapma ya, Ramazanıñız kete de. Uyğun yanaş". Tofik tsirk bitsin dep, açuvından patlay bu vesiqalarnı imzaladı. Lâkin tek mahkemede mündericesinden haberi oldı. Vesiqada, apishane hastahanesiniñ ekimleri qararına köre, Tofik Abdulgaziyev sağlam ve hastahaneden apishanege qaytarıluvına bir itirazı yoq dep aytıla. Künü ve mabüsniñ imzası", – dep tarif etti apayı.
Apayınıñ aytqanına köre, soñki künleri Abdulgaziyev sağlığı yaramay olğanı içün bağğa çıqmadı: yüksek 39° sıcağı, qanda yüksek şeker seviyesi ve ara-sıra körememe.
"Miyninde şişik olğan insan eki yıldan ziyade bir kişilik kamerada buluna ve hastalıqnen bir özü küreşe", – dep qayd etti o.
Rusiye akimiyeti vaziyetni izaatlamadı.
Hatırlatamız, Tofik Abdulgaziyev 2019 senesi martnıñ 27-nde "Hizb ut-Tahrir" davası boyunca işğal etilgen Qırımda tutuldı. 2022 senesi Rostov-na-Donu Cenübiy okrugınıñ arbiy mahkemesi onı 12 yılğa azatlıqtan marum etti.