"Fagot" adı ile belli TNMK gruppasınıñ lideri ve ukrayin çalğıcısı Oleğ Mihaylüt, videoğa Rusiye mahkemesi tarafından 15 yılğa mahküm etilgen Kezlevli ressam ve faal Bogdan Zizanıñ mektübini oqudı.
Bu video "Serbest Qırımğa mektüpler" teşebbüsi çerçivesinde çıqarıldı ve Ukraina prezidentiniñ Qırım Muhtar Cumhuriyetindeki temsilciligi tarafından yayınlandı.
"Bugün Fagotnıñ sesi ile , Rusiyeniñ qanunsız sürette mahküm etken Ukrayina vatandaşlarına diqqat celp etmek içün, Bogdan Zizanı eşittik", — dep yaza müessise Telegram kanalında .
"Fagot" tarafından oqulğan mektüp, 2023 senesi sentâbrniñ 13-nde Ziza tarafından yazılğan edi. Mında qırımlı faal, Rusiye tarafından siyasiy, diniy ve etnik sebeplerden mahküm etilgen, Rusiye Federatsiyasınıñ apishanelerinde tutulğan diger ukrayinalılarnı aña, olnıñ sözlerine köre, olar "quvetçilerniñ basqısına baqmadan, bu divarlar içinde bile deñişmez bir noqtaiy-nazarğa saiptirler".
2022 senesi mayısnıñ 16-na keçken gecesi Rusiye tarafından işğal etilgen Qırımdaki Kezlevniñ Rusiye memuriyetiniñ binası mavı-sarı boya ile boyalandı. Rusiye telükesizlik hadimleri Qırım ressamı Bogdan Zizanı qabaatladı.
Rusiye devlet telekanalı ''Krım 24'' video yayınladı, onda Ziyza yapqanını tanıdı ve peşman oldı. O, Rusiyeniñ "terrorist ve ekstremist" cedveline kirsetildi.
Rusiye FSB-si 27 yaşındaki Zizağa qarşı Rusiye Ceza kodeksiniñ 3o-ncı maddesiniñ 3-nci qısmına ("Cinayetke ıntıluv") ve 205-inci maddesiniñ 1-nci qısmına binaen ("Terroristik akt") cinaiy dava açtı.
Ziza Ukrayina prezidentine muracaat etip, onı ve Qırım ve Rusiye territoriyasında bulunğan diger ukrayinalı siyasiy mabüslerni deñişim cedvellerine kirsetmege rica etti.
2023 senesi iyünniñ 6-nda Rusiyeniñ Rostov-na-Donu Cenübiy okrugınıñ arbiy mahkemesi Bogdan Zizanı 15 yıl umumiy rejimli koloniyada qalmasına üküm etti. Rusiye prokuraturası Bogdan Ziza içün 18 yıl sert rejimli apis cezasını istedi.
2023 senesi sentâbrniñ 27-nde Moskva civarındaki Vlasiha şeerindeki Arbiy istinaf mahkemesi Zizağa çıqarılğan ükümni deñiştirmedi.
Keçken sene noyabrniñ başında, Ziza Rusiyeniñ Perm şeerindeki No29 apishanesinde bulunğanı aqqında haber etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.