Yanvarniñ 24-nde işğal etilgen Qırımnıñ Canköy rayonında Rusiye quvetçileri qırımtatarlarnıñ evlerinde tintüv keçirdiler: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli Osman Abdurazakovnıñ, Canköyde Löman Zekiryayev ve Halil Mambetovnıñ evlerinde keçirile.
Yaqalanğanlar – Ekrem Kroş, Ayder Asanov, Refat Seydametov, Osman Abdurazakov, Leman Zekiryayev ve Halil Mambetov terroristik teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Yaqalanğanlardan biri, Halil Mambetov 67 yaşında.
Qırımnıñ işğal yolbaşçısı Sergey Aksönov qırımtatarlarnıñ evlerinde keçirilgen tintüvlerni izaatlap, quvetçiler "Ukrayina ile alâqalarda" qabaatlanğan altı kişini yaqalağanını bildirdi.
Uquq qoruyıcı Lutfiye Zudiyevanıñ Qırım.Aqiqatqa bildirgeni kibi, Rusiyeniñ nezaretinde olğan Qırım mediaları artıq RF FSB-sı yarımadada "Ukrayinadan idare etilgen islâmcı bölükni" yaqalağanı ile bağlı malümat yayınlağan.
"Bu, bir "terrorcılıq" faaliyeti ile bağlı resmiy suçlaması altında qırımtatar faalleriniñ, Qırım sakinleriniñ, qırımtatarlarnıñ yaqalanmasını kene köstere", - dedi Zudiyeva.
Lutfiye Zudiyeva
Yaqalanğanlar arasında Canköy rayonınıñ Timofeyevka köyünden 29 yaşındaki Ayder Asanov bar. Onıñ anası Venera Asanova Qırım.Aqiqatqa tintüv nasıl keçirilgeni aqqında aytıp berdi.
Ayder Asanov
"Yattırtmaq içün tizlerine avtomatnen urdılar. Balalar ile apayını bir odağa qapattılar. Qızı dört yaşanda, oğlu yedi aylıq. Balalar ağlay. Apayına qarşı silâ tuttılar. Digerleri yürip, evni tinttiler", - dedi Venara Asanova.
Venera Asanova
SİZO-ğa yollanğanlarnıñ çoqusı 2017 senesi bir kişilk piketlerde iştirak etken faaller. 2017 senesi oktâbrniñ 14-nde bütün Qırım boyunca bir kişilik piketler keçirilgen edi. Adamlar quvetçilerniñ Qırımda keçirgen tintüvlerge narazılıq bildirmek içün çıqqan ediler. O zaman Rusiye polisi 49 kişini yaqalağan edi.
Bundan ğayrı haber etilgeni kibi, yaqalanğan qırımtatar faalleri siyasiy mabüslerniñ qorantalarına yardım ete ediler.
"Qırım birdemligi"niñ malümatına köre yanvarniñ 25-nde mahkeme oturışları keçirilecek ve yaqalanğanlar içün sıñırlama tedbirleri tayin etilecek.
Ukrayina prezidentiniñ Qırım MC daimiy temsilciligi vaqtınca işğal etilgen Qırımda Ukrayina vatandaşlarınıñ evlerinde keçirilgen tintüvlerni takbih etti.
"Temsilcilik işğal memuriyetiniñ qanunsız areketlerini takbih ete ve Rusiyeden qanunsız sürette yaqalanğan Ukrayina vatandaşlarını, tamır qırımtatar halqınıñ temsilcilerini deral azat etmege talap etemiz", - dep yazıla bildirmede.
Bundan ğayrı temsilcilikte qanun qoruyıcı organlarınıñ ve QMC prokuraturasınıñ diqqatını Rusiye quvetçileri tarafından Ukrayina vatandaşlarınıñ aqlarınıñ qaba tarzda bozulmasına çektiler.
"Dünya toplulığını tecavuzcı memleketke sisiy ve sanktsiyalar tazyığını devam ettirmege çağıramız", - dep qoştılar temsilcilikte.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.