Rusiye mahkemesi tarafından 16,5 yılğa üküm etilgen "qırımlı musulmanlar davasınıñ" mabüsi Teymur Abdullayev Salavat (Başqortostan Cumhuriyeti) İK-2-de 15 künge ceza izolâtorına (ŞİZO) alındı. Közeticiler kamerağa kirgende o, namazını taşlamağan eken, bunı da sebep körgenler. Bu aqta anası Dilâra Abdullayeva advokatnıñ malümatına esaslanıp içtimaiy ağlarında yazdı, dep haber ete "Qırım birdemligi" cemaat birleşmesi.
Abdullayeva sert şarait baraqında tutulğan oğlu dekabrniñ 16-ndan berli ŞİZOda buluna.
"[Kozeticiler] teşkermege kene namaz vaqtında aselet kirgenler, taşlamaycağını bilip. Mından da ceza: turmadı, qarşılamadı. <…> Mahsus SUSqa kirgenler, sert rejim koloniyasında eñ sert şaraitler kamerasına, namaz qılğan er kesni daa beter şaraitlerge, beton kamerağa taşlamaq içün. Sert şarait kamerasında dört kişi tutula, musulmanlar, bu sıfırdan aşağı 20-22 derecede buz avada", – dep yazdı Dilâra Abdullayeva.
Onıñ malümatına köre, Teymurğa qoşma bir ceza berilmese, dekabrniñ 31-ne onı kene SUSqa qaytarırlar.
Bu 15 kün sayılsa, Abdullayev ceza izolâtorında keçken seferlernen beraber umumen 1035 kün keçirecek. Böyle cezalar Abdullayev 2020 senesi mart ayında Başqortostan Cumhuriyetine etap etilgen soñ başladı. Bu vaqıttan berli erkek toqtamayıp ceza izolâtorına alındı. İzolâtorda cezası bitken soñ erkekni sert tutuv şaraitleri kamerasına yollaylar.
Oña apishanedeki "Zonatelekom" bağınen telefon etmege yasaq eteler. Tuvğanlarınen tek mektüp vastasınen mümkün, dep yaza "Qırım birdemligi".
Daa evel haber etkenine köre, Rusiye tarafından mahküm etilgen qırımtatarlar Teymur ve Üzeir Abdullayevler Salavat şeeriniñ koloniyasında kritik şaraitlerde tutula.
Abdullayevler Rusiye mahkemesi tarafından "Hizb ut-Tahrir davaları" boyunca mahküm etildi. Olarnı 2003 senesinden berli Rusiyede yasaqlanğan, amma Ukrayina ve diger memleketlerde faaliyeti serbest olğan "Hizb ut-Tahrir" halqara islâm siyasiy teşkilâtında iştirak etkeninde qabaatlaylar.