Ukrayına içün zafer serbest Ukrayına Qırımı ve serbest Ukrayına vatandaşları olacaq. Bu aqta Türkiyedeki «Qırım künleriniñ» açılışında çıqışta bulunğan Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva bildirdi.
«Qırım künleriniñ açılışında çıqışta bulunıp, zenaatdaşlarıma Ukrayına içün topraq meselesinen bağlı uzlaşuvlar meselesi qabul etilmeycek, dep hatırlattım, şunıñ içün topraqlarımız ve işğalciler tarafından aqları muntazam sürette bozulğan vatandaşlarımız içün küreşemiz», – dep aytıla Taşevanıñ Facebooktaki haberinde.
Onıñ malümatına köre, o, Türkiye Büyük Millet Meclisiniñ Tış işler komitetiniñ reisi Akif Çağatay Kılıçqa Qırımda qanunsız şekilde apiske alınğan esli-başlı, sağlığında problemleri olğan qırımtatarlarnıñ cedvelini berip, olarnıñ tez vaqıtta azat etilüvinde ve kerekli tibbiy yardım kösterilüvinde yardımcı olmağa rica etti.
Dekabrniñ 17-nde Ukrayına prezidentiniñ Qırım Muhtar Cumhuriyetindeki daimiy temsilciligi 30 yılını toldurdı.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva Qırım işğalden azat etilgen soñ rusiyeliler çıqarıla bilgenini aytqan soñ qorquzuvlar alıp başladı, dep haber etti. O, Qırımdaki rus tarafdarı bloger Aleksandr Talipovnıñ «Krımskiy SMERŞ» telegram kanalında şahsiy malümatlarınıñ derc etilüvini «daa bir qorqu örnegi» dep adlandırdı.
2022 senesi aprel ayında Tamila Taşeva Ukrayına prezidentiniñ Qırım Muhtar Cumhuriyetindeki daimiy temsilcisi vazifesine tayin etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.