Oraqnıñ 14-nde gece Ukrayina pilotsız sistemalarınıñ quvetleri Azaq deñizinde Rusiye Federatsiyasınıñ kölge flotunıñ daa 11 gemisine ücüm etti, dep bildirdi Ukrayina arbiy quvetleriniñ telükesizlik ştabınıñ komandanı Robert Brovdi ("Madâr") içtimaiy ağlardaki saifelerinde.
"Oraqnıñ 14-ne keçer gecesi +11. 9 kün içinde Azaq deñizinde "MoLocka" operasiyası çerçivesinde 116 gemi tutıldı: 5 tanker, 5 quru yük ve 1 çekici. Kölge flotu anoreksiyağa oğray, amma çeşit olaraq yoq olmaq kerek", — dep aytıla video ile paylaşılğan beyanatta.
Brovdiniñ añlatqanına köre, tankerlerge yapılğan darbeler, diger şeylernen beraber, Qırımğa benzinniñ Azaq deñiziniñ "ağız boğazından" ketirilmesini sıñırlay, esas ve pek telükeli yol — avtomobil ve demir yol sisternaları ola.
Rusiye arbiyleri ve akimiyeti bu darbelerni şimdilik daa izaatlamadı.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.