Ukrayina merkeziy saylav komissiyası prezidentniñ Qırım Muhtar Cumhuriyetindeki daimiy vekili Tamila Taşevanı saylanğan halq deputatı olaraq belgiledi. O, mandattan vazgeçüv arizasını bergen İvan Primaçenkodan soñ nevbetteki ola.
Merkeziy saylav komissiyasınıñ matbuat hızmeti qayd etkenine köre, İvan Primaçenko deputatlıq mandatından vazgeçken ve vekâletleri lâğu etilgen beyanat baqıldı.
«Bunıñnen beraber, Komissiya «Ğolos» siyasiy firqasınıñ saylav cedveline №26 olaraq kirsetilgen nevbetteki namzet Tamila Taşevanı bu saylavlarda Ukrayinanıñ saylanğan halq deputatı olaraq tanıdı», – dep qayd etti Merkeziy saylav komissiyası.
Primaçenko 2024 senesi oktâbr ayında Oleg Makarovnıñ vefatından soñ halq deputatı olaraq tanıldı. Lâkin Prometheus online tasil platformasınıñ tesisçilerinden biri olğan Primaçenko Ukrayina Yuqarı Radasında çalışmaqtan vazgeçti.
Aynı vaqıtta Taşeva «Ğolos» firqasından Yuqarı Radağa deputat olmaycaq, dep bildirdi.
«Şimdi öz vazifemde kerekim. Beş yıldan berli prezidentniñ vertikalinde çalışam. Men özümni prezidentniñ siyasiy taqımınıñ azası dep sayam. Ebet, şimdi epimiz bir maqsat içün, Ukrayina devleti içün çalışamız, amma şimdilik parlamentke ketmege niyetim yoq», – dedi o, Ukrayina milliy telemarafonında.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.