Ukrayina Yuqarı Radasında Ukrayina tamır halqlarınıñ temsiliy organlarınıñ faaliyetine dair qanunlarğa deñişmeler kirsetilüvini belgilegen №16176 qanun leyhası qayd etildi. Vesiqa qırımtatarlar, qaraylar ve qırımçaqlarnıñ aqlarını temin etmek içün azırlandı. Bu aqta Ukrayina halq deputatı Tamila Taşeva haber etti.
Onıñ aytqanına köre, qanun leyhası Qırımtatar Milliy Meclisiniñ teşebbüsinen azırlandı. Vesiqanı Meclis vekilleri, hususan reisi Refat Çubarov, halq deputatları Mustafa Cemilev ve Ahtem Çiygoz ve Ukrayina Adliye nazirliginiñ temsilcileri azırladı.
"Bu leyha – qırımtatarlar, qaraylar ve qırımçaqlarnıñ aqlarını qorçalaycaq sağlam uquq temeliniñ quruluvı aqqında. O, Ukrayinanıñ "Tamır halqlar" qanunı belgilegen aqlarınnıñ tamır halqlarnıñ temsiliy organları tarafından semereli yerine ketirilüvini temin etecek", – dep qayd etti Taşeva.
Deputatnıñ aytqanına köre, qanun leyhasınıñ qabul etilüvi Ukrayinanıñ tamır halqlarnıñ aqlarını qoruv mecburiyetleriniñ yerine ketirilüvinde daa bir adım olacaq.
"Qırımnıñ işğalden azat etilüvinden soñ ve onıñ ğayrıdan tiklenmesinde böyle ve diger aletler yarımada reintegratsiyası ve ealiniñ tuvğan serbest evini ğayrıdan tiklemesinde iştirak etmeçi içün temel olacaq", – dep qayd etti Taşeva.
Ukrayina Yuqarı Radasınıñ saytında olğan malümatqa köre, №16176 qanun leyhası 2026 senesi oktâbrniñ 22-nde qayd etildi. Taşevadan ğayrı, teşebbüsçileri arasında Mustafa Cemilev, Ahtem Çiygoz, Yuqarı Rada reisiniñ birinci muavini Öleksandr Kornienko ve diger halq deputatları bar. Vesiqa parlament komitetiniñ baquvına yollanıldı.
2021 senesi iyul ayında Ukrayina Yuqarı Radası qırımtatarlar, qaraylar ve qırımçaqlarnı memleketniñ tamır halqları olaraq tanığan "Ukrayinanıñ tamır halqları" qanunını qabul etti. Qanun esas aqlarını hususan medeniyet, tasil, til saasında belgiley ve tamır halqlarnıñ temsiliy organlarını quruluvı ve faaliyetini belgiley.