Parlamentlerara birlik assambleyasınıñ esas munaqaşaları vaqtında Ukrayina halq deputatı Tamila Taşeva Qırımnen bağlı çıqış yapqan soñ Rusiye narazılıq bildirdi. Bu aqta Taşeva Facebook saifesinde bildirip, çıqışını derc etti.
"Tamır qırımtatar halqı içün devlet esnaslarından haberdar oluv nazariy bir şey degil. Bu itibar ve öz toprağında serbest yaşav aqqı meselesi ola. Ve Ukrayina tamır halqlarnıñ aqlarını qanun seviyesinde qorçalasa, Rusiye işğal etilgen yarımadağa repressiya, qorqu ve sahte saylavlarnı ketirdi", – dep yaza Taşeva video altında.
Onıñ bildirgenine köre, "bizim maqsadımız topraqlarnıñ azat etilüvi olmalı. Qırımğa azatlıqnı qaytarıp, Qırımnı ait olğan insanlarına qaytarmalımız". Bundan ğayrı, o, halqara zenaatdaşlarına muracaat etip, dekabrniñ 7-nde Londrada olacaq "Qırım platforması" Beşinci parlament sammitine qoşulmağa davet etti.
Taşevanıñ bildirgenine köre, onıñ çıqışından soñ Rusiye esas munaqaşalarda narazılıq bildirdi.
"Er bir çıqışımız vaqtında Rusiye itiraz etti. Bu da parlament diplomatiyasınıñ ve böyle halqara meydançıqlarda Ukrayinanıñ faal bulunuvı ne qadar müim olğanını yahşı köstere", – dedi Taşeva.
2014 senesi fevral ayında bir işareti olmağan silâlı insanlar Qırım Muhtar Cumhuriyeti Yuqarı Radası, Qırım Muhtar Cumhuriyeti Nazirler şurası, Aqmescit ava limanı, Keriç parom keçiti, diger strategik obyektlerni zapt etti ve Ukrayina ordusınıñ areketlerini blok etti.
2014 senesi martnıñ 16-nda Qırım ve Aqyarda çoqusı memleket tarafından tanılmağan sahte referendum olıp keçti, Rusiye Qırımnı qanunsız şekilde ilhaq etti. Ukrayina, Avropa Birligi, ABD bu tedbirde rey berüv neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege "qoşulğanı" aqqında ilân etti.
Halqara teşkilâtlar Qırım işğali ve ilhaqını qanunsız tanıp, Rusiye areketlerini takbih etti.