Rusiye tarafdarı olğan qırımlı bloger Aleksandr Talipov Rusiye Federatsiyası tarafından ilhaq etilgen Qırımnıñ sabıq prokurorını, Rusiye Devlet dumasınıñ "Yedinaya Rossiya" firqasından sabıq deputatı Natalya Poklonskayanı qırımlılarnı Ukrayina tarafdarı olğanları içün taqip etken Rusiye quvetçileriniñ "areketini" takbih etüvde qabaatladı.
Talipovnıñ yazğanına köre, Poklonskaya içtimaiy ağlarda "Rusiye ordusınıñ itibarını tüşürgeni içün mesüliyetke çekilgen Gurzuf sakini" ile bağlı sualge cevap berip, oña ve "Krımskiy SMERŞ"ke boşboğazlar ve populistler degen. Talipov, Poklonskanıñ "Vkontakte" rusiyeli içtimaiy ağında bergen cevabı ile bağlı resimni öz telegram kanalında derc etti.
"Bu maña degil de, toprağımızdaki terroristik areketlerni toqtatqan ve cinayetçilerni tapqan uquq qoruyıcılarğa qarşı bir sözdir. Natalya Vladimirovna "mayor" arqadaşnıñ işini itibardan tüşürdi, siz onıñnen razısıñızmı?" – dep yazdı Talipov.
Cevap yazılğan akkaunt, Natalya Poklonskayanıñ "Vkontakte" rusiyeli içtimaiy ağındaki saifesi degil. Poklonskayanıñ özü Talipovnıñ qabaatlavlarını şimdilik izaatlamadı.
Natalya Poklonskayanıñ "Vkontakte" içtimaiy ağındaki cevabı ile ekran resmi
2022 senesi iyün ayında Poklonskaya, o vaqıt Rusiye baş prokurorınıñ mesleatçısı vazifesine tayinlengeni sebebinden içtimaiy ağlarda faaliyetini toqtatqanını bildirgen edi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ "diskreditatsiyası" içün memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.