"Sıñırsız mühbirler" halqara teşkilâtı dört yıl evel FSB hadimleri tarafından tutılıp esir etilgen Qırımlı vatandaş jurnalisti İrına Danılovıçnıñ acele azat etilmesi içün çağıruv yayınladı. Mütenasip haber teşkilâtnıñ X içtimaiy ağındaki resmiy saifesinde derc etildi.
Beyanatta qayd etile ki, mustaqil jurnalist İrına Danılovıçnı işğal etilgen Qırımda Rusiye ordusı apiske aldı. Bugün o, adaletsiz mahkeme neticesinde berilgen 7 yıllıq apis cezasını çekip, insaniyetsiz şaraitlerde apiste tutula.
Hatırlatamız ki, Sabannıñ 31-nde vatandaş jurnalisti İrına Danılovıçnıñ qız qardaşı Qırım.Aqiqatqa FSİN hadimleri "İrınanı maqsatlı olaraq ölüdürecek olalar", dep bildirdi. Daa evel İrına Danılovıçnıñ özü, apiske alınğan qadınlarğa, parlaq yarıqlar ve yüksek sesli muzıka ile işkence kibi, izsiz işkence qullanılğanını bildirgen edi. Koloniyada bu arizalardan soñ teşkerüv keçirildi, bir de bir bozuv tapılmadı.
2022 senesi Qırımlı jurnalist ve aq qorçalayıcı İrına Danılovıçnı FSB hadimleri qaçırdı. Daa soñra onı patlayıcı maddeler saqlağanında qabaatladılar, tahqiqat izolâtorında ise otit hastalığı sebebinden tibbiy yardım kösterilmedi. Neticede faalniñ bir qulağı eşitmey ve tedaviylenmey.
2024 senesi Armanda, koloniyağa kelgen soñ, Danılovıç qulaq ve baş ağrıları sebebinden tibbiy bölükke muracaat etti, amma cevap olaraq ekim Lidiya Morozova Danılovıç sağırlaşqan soñ, ağrı özü keçecegini bildirdi.