"Sıñırsız mühbirler", apiste 22 kilo azğan Rusiye tarafından mahküm etilgen cemaat jurnalisti ve faal Osman Arifmemetovnı tibbiy baqınuvdan keçirmege çağırdı.
"RSF, onıñ apis şaraitlerini takbih ete ve tibbiy közetüv ve azat etilmesini talap ete", — dep aytıla beyanatta.
Bundan evel Arifmemetovnıñ anası "Qırım birdemligine" bildirdi ki, şimdi oğlu sert tutuv şaraitlerinde buluna ve oña telefon qulanmaq mümkün degil. Lâkin onı sert tutuv şaraitlerine ne içün yerleştirgenleri belli degil.
Bundan da ğayrı, apishanedeki bütün mahkümlerge domuz etini bereler, qırımtatar diniy baqışları içün onı aşamay. Ğaliba, Arifmemetov yaramay aşağanı sebebinden bayağı azdı.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan "Qırım birdemligi" cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
"Memorial" aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz