Tintüv ve basqı aqqında sübetleştiler. “Qırım birdemligi” nevbetteki oturışını keçirdi

Qırımtatar faali Pakize Çauş, yaqında "Veciye Kaşka davası" boyunca keçken mahkeme oturışı aqqında aytıp berdi, anda Qırım Yuqarı mahkemesiniñ icracılarından birisi - Sergey Berezko, mahkeme binası yanına kelgen qırımtatarlar aqqında terroristler dep ayttı.

Mabuslarnıñ soy-aqrabası ve uquq qoruyıcılarnıñ çıqışlarından ğayrı, "Qırım birdemligi"niñ oturışlarında adet üzre dua da keçirile. Sürette - Liana - Aqmescit "Hizb ut-Tahrir davası"nıñ iştirakçisi Emil Cemadenovnıñ apayı. Onı ve daa beş qırımtatarnı 2016 senesi oktâbr 12-sinde tuttılar. Olarnıñ episini, Rusiyede yasaq etilgen "Hizb ut-Tahrir" teşkilâtınıñ azalığında qabaatlaylar.

Cemaat jurnalisti ve faal Lutfiye Zudiyeva dua vaqtında. Soñki vaqıtları o cemaat faali olaraq qırımlılarnı memuriy mahkemelerde qorçalay.

Naciye Aliyeva - Qırımda taqip etilgenlerniñ apayı ve anası. Onıñ aqayı Alim Aliyevni Rusiyede yasaqlanğan "Hizb ut-Tahrir" teşkilâtınen bağ olğanında qabaatlaylar. O tutılğan ve "Yalta taqımı" davası boyunca mahküm etile. Bundan ğayrı, onıñ büyük qızı Gülsüm Aliyevağa Facebookta yazı paylaşqanı içün cinaiy dava açıldı.

Advokatlar Nikolay Polozov ve Edem Semedlâyev toplaşuvda bir şey muzakere ete

Advokatlar Emil Kurbedinov ve Ayder Azamatov mahsus blokka qoyulğan mabuslar aqqında aytıp berdi. Bu - daimiy video közetüvinen eki adamlıq apis odası. Advokatlar aytqanına köre, birinci Bağçasaray "Hizb ut-Tahrir davası"nıñ iştirakçisi Enver Mamutovnı apiste mahsus blokqa avuştırdılar, ekinci Bağçasaray "davası"nıñ iştirakçisi Ernes Ametov ise endi bir aydan ziyade Aqmescit SİZOsınıñ mahsus blokında buluna.

Apis etilgen uquq qoruyıcı Server Mustafayevniñ babası, Rustem Mustafayev toplaşuvdaki çıqışlarnı diqqatnen diñley. Onıñ oğlu 2018 senesi yazda tutıldı. O zaman quvetçiler Serverge qarşı küç qullandı ve onıñ elini qırdı.

Teşebbüsniñ toplaşuvı "Qırım birdemligi" cemaat jurnalistlerniñ kamerasında.

Zekkuiy Kulametov - Qırım quvetçileri taqip etken aileniñ başı. 2018 senesi sentâbr 4-ünde o, içtimaiy ağda yazı derc etkeni içün 10 künlük memuriy tevfiqine maküm etildi. Bundan ğayrı, onıñ qadını Zarema Kulametova ve büyük qızı Riana Kulametova da memuriy tevfiqke maküm etildi, amma para cezasınen qutuldılar.

Elmaz Akimova - Han Sarayınıñ "tamiri"ne qarşı bir kişilik piketke çıqqanlardan birisi. Sürette qız rusiye mahkemeleri tarafında apis ve maküm etilgenlerge mektüp yaza.

SİZOğa mektüp tintüvlerden soñ babalarında ayırılğan balalar da yaza. Olarnıñ çoqusı, aqaylar endi apis etilgeninden soñ doğdı.