Bazarertesi künü, mayısnıñ 18-nde, sovetler rejimi qırımtatarlarnı Qırımdan sürgün etip başlağanına 82 yıl tola. Bu künü Ukrayinada Qırımatatar halqı genotsidiniñ qurbanlarını añma künü devlet seviyesinde qayd etile.
1944 senesi bu künde sovetler rejimi qırımtatar halqını Qırım yarımadasından Orta Asiya ve Uralğa sürgün etip başladı. Umumen tahminen 200 biñ insan sürgün etildi. 40 yıldan ziyade Qırımğa qaytmaq yasaq edi. Çeşit malümatqa köre, yollarda ve sürgünlik yerlerinde zorbalıq, açlıq, suvuq ve hastalıqtan sürgün etilgenlerniñ aman-aman yarısı vefat etti.
"Sürgünlikniñ maqsadı qırımtatar halqını toplulıq olaraq bozmaq ve yarımada tarihından silmek edi. Meselâ, sovetler akimiyeti 640 başlağıç mektep kütüphanesi, 221 orta mektep kütüphanesi, 360 oquv yuvini yoq etti; 861 qırımtatar mektebini yıqtı; qırımtatarlarnıñ 80 biñ evini aldı; 2400 mezarlıqnı topraqnen bir etti, baş taş, aziz yerlerni yoq etti…", – dep aytıla Ukrayina prezidentiniñ Qırımdaki Daimiy temsilciliginiñ beyanatında.
Ukrayina Yuqarı Radasınıñ qararına köre, mayısnıñ 18-i Qırımtatar halqı genotsidiniñ qurbanlarını añma künü ilân etildi.
Adet üzre mayısnıñ 18-nde Ukrayinada qırımtatar halqınıñ Qırımdan sürgün etilüviniñ qurbanlarını añma matem tedbirleri keçe, lâkin bu yıl, 2022 senesinden başlap er yıl olğanı kibi, Rusiyeniñ arbiy istilâsı ve Qırım işğali kütleviy tedbirlerniñ keçirilüvine tesir ete.
Rusiye işğal etken Qırımda añma aktsiyaları yasaq altında. Qırımtatar halqı genotsidiniñ qurbanlarını añma künü arfesinde Rusiye uquq qoruyıcıları qırımtatar faallerine kütleviy aktsiyalar vaqtında "qanun bozulmaycağına dair" tenbi berdi.