Rusiye kontrolindeki Sudaq mahkemesi keçken afta Qapsihorda akimiyet ve quvetçiler tarafından evi yıqtırılğan qırımtatar milliy areketiniñ veteranı Rustem Useinovğa masraflarnı ödetmege qarar berdi.
Qarar noyabrniñ 29-nda mahkeme saytında derc etildi.
«Useinov Rustem Abibullayeviçke Qırım Cumhuriyetiniñ Sudaq şeeri memuriyetine 2021 senesi yanvarniñ 21-nde keçirilgen №91/6-2 umumiy mahkeme topraq tizüv ve qurucılıq-tehnik ekspertizası boyunca 42 856,00 (qırq eki biñ sekiz yüz elli altı) rublelik masraflarnı ödetmek. Useinov Rustem Abibullayeviçke yerli bücet kelirine devlet alımınıñ ödenmesinen bağlı 300, 00 ruble mahkeme masraflarını ödetmek», – dep aytıla metinde.
Qayd etilgenine köre, qarar mahkeme qararı alınğan künden başlap bir ay içinde istinaf etile bile.
Yerli faallerniñ qayd etkenine köre, paranıñ bir qısmı onıñ pensiyasından kesilecek.
Noyabrniñ 24-nde Qapsihor köyünde (Sudaq) Rusiye akimiyeti qırımtatar milliy areketiniñ veteranı Rustem Useinov mahkeme qararına qarşı istinaf şikâyetini bergenine baqmadan, evini yıqtı. Er adamı yaramadı, acele yardım ekimleri qan basımı yükselgeni içün onı alıp ketti. Ukraina Tış işler nazirligi ev yıqıluvını takbih etti. Ukraina prezidentiniñ Qırım Muhtar Cumhuriyetindeki temsilciligi Qırımda insanlarğa qarşı «repressiyalarnı toqtatmağa» çağırdı.
Useinovnıñ jurnalistlerge aytqanına köre, onıñ Qapsihornı terk etmege niyeti yoq. O, hastahaneden çıqap, evi olğan yerde çadır qurmağa ve «tuvğan toprağında yaşamaq aqqı oğrunda küreşini» devam ettirmege niyetlene.
Akimiyet organları ve memuriyet vekilleri açıq tefsir ve izalar bermey.