Meganom burnu yanında Kapsel körfezinde Rusiye akimiyeti yıqqan qurucılığı bitmegen cami binası yerinde hristian kilsesini qurıp başladılar. Bu aqta Qırım.Aqiqat mühbiri haber ete.
Haber levhasında aytılğanına köre, «mında Sudaq şeerindeki Meganom dağında Velikomüçenik Georgiy Pobedonosets kilsesi qurulacaq». İşler 2023 senesi sentâbr ayında başlandı ve 2024 senesi mayıs ayında bitecek.
Qırımtatar Milliy Meclisiniñ reis muavini İlmi Umerov Qırım.Aqiqatqa izaat berip, qurucılıqnı «açıq tsinizm» dep adlandırdı.
Meganomda kilse qurulğan yer
«Şimdiki akimiyetniñ açıq tsinizmi ve qırımlı musulmanlarğa qarşı üstünlik numayışı. Müellifler ekseriyet qoltutar ve bu olarnı aqlar, dep tüşüne. Amma cami qurucılığını bitirip, kilseni başqa yerde ne içün qurmadılar? Yüz yıllarnen Rusiye kontrol etken yerlerinde bir çoq halqnıñ özgünlik alâmetlerini yoq etti. Medeniy inşaatlar ve abidelerden başlay ediler», – dep qayd etti Meclis reisiniñ muavini.
Mında yerli musulmanlarnıñ parasına qurulğan cami binası 2022 senesi yazda yıqılğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.