NATO baş kâtibi Yens Stoltenberg avgustnıñ 28-nde çarşenbe künü Kıyivniñ ricası ile Ukrayina — NATO Şurasınıñ toplaşuvını çağıra. Bunı Reuters agentligi, ittifaqdaşlıqnıñ matbuat kâtibi Farah Dahlallahnıñ beyanatına atıf etip bildire.
Onıñ aytqanına köre, toplaşuv elçiler seviyesinde keçirilecek.
"Ukrayina mudafaa naziri Rustem Ümerov videomuracaat vastasınen ittifaqdaşlarğa cenk alanındaki vaziyet ve birinci nevbette olğan ihtiyaclar aqqında haberdar etecek", — dep qoştı o.
Daklalla, körüşüv Rusiyeniñ Ukrayinağa ücüm dalğasından soñ olacaq, dep qoştı.
"NATO ittifaqdaşları Ukrayinanıñ ava mudafaasına büyük destek kösterdi, ve olar Ukrayinanıñ mudafaasını daa da quvetleştirmege azırlar", — dep ayttı spiker.
Bazarertesi künü, avgust 26-na keçer gecesi, Rusiye ordusı Ukrayinanıñ kritik infrastruktura obyektlerine, hususan, memleketniñ yaqarlıq-energetika sektorına kütleviy darbeler endirdi. Ukrayina arbiy ava quvetlerinde qayd ettiler ki, Rusiye ordusı Ukrayinağa 127 raketa ve 109 dron uçurdı. Avağa qarşı uruş neticesinde 201 ava nişanı — 102 raketa ve 99 dron tüşürildi.
Ukrayina Fevqulâde vaziyetler devlet hızmetiniñ malümatına köre, yedi insan elâk oldı, şu cümleden ekisi hastahanede vefat etti, 47 insan yaralandı, olardan dörtü — 2014, 2017 ve 2024 senesi doğğan balalar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.